Esther 4:12-17

Biblia Sacra Vulgata

¹² Quod cum audisset Mardochaeus,

¹³ rursum mandavit Esther, dicens: Ne putes quod animam tuam tantum liberes, quia in domo regis es prae cunctis Judaeis:

¹⁴ si enim nunc silueris, per aliam occasionem liberabuntur Judaei: et tu, et domus patris tui, peribitis. Et quis novit utrum idcirco ad regnum veneris, ut in tali tempore parareris?

¹⁵ Rursumque Esther haec Mardochaeo verba mandavit:

¹⁶ Vade, et congrega omnes Judaeos quos in Susan repereris, et orate pro me. Non comedatis et non bibatis tribus diebus et tribus noctibus: et ego cum ancillis meis similiter jejunabo, et tunc ingrediar ad regem contra legem faciens, non vocata, tradensque me morti et periculo.

¹⁷ Ivit itaque Mardochaeus, et fecit omnia quae ei Esther praeceperat.