Ephesios 2:17-22

Biblia Sacra Vulgata

¹⁷ Et veniens evangelizavit pacem vobis, qui longe fuistis, et pacem iis, qui prope.

¹⁸ Quoniam per ipsum habemus accessum ambo in uno Spiritu ad Patrem.

¹⁹ Ergo jam non estis hospites, et advenae: sed estis cives sanctorum, et domestici Dei,

²⁰ superaedificati super fundamentum apostolorum, et prophetarum, ipso summo angulari lapide Christo Jesu:

²¹ in quo omnis aedificatio constructa crescit in templum sanctum in Domino,

²² in quo et vos coaedificamini in habitaculum Dei in Spiritu.