33 “Koma tsopano, inu abambo Yobu chonde mverani mawu anga;
    mutcherere khutu zonse zimene ndinene.
² Tsopano ndiyamba kuyankhula;
    mawu anga ali pa msonga ya lilime langa.
³ Mawu anga akuchokera mu mtima wolungama;
    pakamwa panga pakuyankhula zoonadi zimene ndikuzidziwa.
⁴ Mzimu wa Mulungu wandiwumba,
    mpweya wa Wamphamvuzonse umandipatsa moyo.
⁵ Mundiyankhe ngati mungathe;
    konzekani tsopano kuti munditsutse.
⁶ Ine ndili monga inu pamaso pa Mulungu;
    nanenso ndinachokera ku dothi.
⁷ Musachite mantha ndipo musandiope ayi,
    Ine sindikupanikizani kwambiri ayi.

⁸ “Koma inu mwayankhula ine ndikumva,
    ndamva mawu anuwo onena kuti,
⁹ ‘Ndine wolungama mtima ndi wopanda tchimo;
    ndine woyera mtima ndipo ndilibe cholakwa.
¹⁰ Komatu Mulungu wapeza zifukwa zoti anditsutsire nazo;
    Iye akundiyesa ngati mdani wake.
¹¹ Iyeyo wamanga mapazi anga mʼzigologolo,
    akulonda mayendedwe anga onse.’

¹² “Koma ine ndi kuti kwa inu, inuyo simukukhoza pa zimenezi,
    pakuti Mulungu ndi wamkulu kupambana munthu.
¹³ Chifukwa chiyani mukudandaula kwa Iye
    kuti sayankha mawu ena aliwonse a munthu?
¹⁴ Pajatu Mulungu amayankhula mwa njira zosiyanasiyana,
    ngakhale munthu sazindikira zimenezi.
¹⁵ Mʼmaloto, mʼmasomphenya usiku,
    pamene anthu ali mʼtulo tofa nato
    pamene akungosinza chabe pa bedi,
¹⁶ amawanongʼoneza mʼmakutu
    ndi kuwaopseza ndi machenjezo ake,
¹⁷ kumuchotsa munthu ku zoyipa,
    ndi kuthetseratu kunyada kwake,
¹⁸ kumulanditsa munthu ku manda,
    kuti moyo wake usawonongeke ndi lupanga.

¹⁹ “Mwina Mulungu amalanga munthu ndi matenda ndi ululu ali pa bedi pake,
    nthawiyo thupi lake lonse limangophwanya,
²⁰ kuti asakhalenso ndi chilakolako cha chakudya,
    ndipo amanyansidwa ndi chakudya chabwino chomwe.
²¹ Thupi lake limawonda
    ndipo mafupa ake, omwe anali obisika, tsopano amaonekera poyera.
²² Munthuyo amayandikira ku manda,
    moyo wake umayandikira kwa amene amabweretsa imfa.

²³ “Koma patakhala mngelo ngati mthandizi,
    mmodzi mwa ambirimbiri oterewa,
    adzafotokoza zimene zili zoyenera,
²⁴ kudzamukomera mtima ndi kunena kuti,
    ‘Mupulumutseni kuti asapite ku manda;
    ine ndapeza cholowa mʼmalo mwa moyo wake,’
²⁵ pamenepo thupi lake lidzasanduka lasee ngati la mwana;
    ndipo adzabwezeretsedwanso kukhala ngati mʼmasiku a unyamata wake.
²⁶ Akapemphera kwa Mulungu, iyeyo adzalandiridwa.
    Mulungu adzamulandira mwa chimwemwe
    ndipo adzamubwezeretsa pamalo ake oyamba.
²⁷ Ndipo adzabwera kwa anzake ndi kunena kuti,
    ‘Ndinachimwa ndipo sindinachite zolungama,
    koma sindinalangidwe koyenerana ndi kuchimwa kwanga.
²⁸ Iye anapulumutsa moyo wanga kuti usapite ku manda,
    ndipo ndidzakhala ndi moyo ndi kuonanso kuwala kwa dzuwa.’

²⁹ “Mulungu amachita zonsezi kwa munthu
    kawirikawiri,
³⁰ kupulumutsa moyo wa munthuyo ku manda,
    kuti athe kuonanso kuwala kwa moyo.

³¹ “Abambo Yobu, tcherani khutu ndipo mundimvere;
    khalani chete kuti ndiyankhule.
³² Ngati muli nʼchoti munene, ndiyankheni;
    yankhulani, pakuti ine ndikufuna mupezeke wolungama.
³³ Koma ngati sichoncho, mundimvere;
    khalani chete ndipo ine ndidzakuphunzitsani nzeru.”