31 “Ndinachita pangano ndi maso anga
    kuti sindidzapenya namwali momusirira.
² Kodi Mulungu kumwambako wandisungira zotani?
    Kodi cholowa changa chochokera kwa Wamphamvuzonse kumwambako nʼchotani?
³ Kodi si chiwonongeko kwa anthu oyipa,
    tsoka kwa iwo amene amachita zolakwa?
⁴ Kodi Mulungu saona zochita zanga,
    ndi kudziwa mayendedwe anga?

⁵ “Ngati ndachita zinthu mwachiphamaso,
    kapena kufulumira kukachita zachinyengo,
⁶ Mulungu andiyeze ndi muyeso wake wolungama
    ndipo Iye adzadziwa kuti ine ndine wosalakwa,
⁷ ngati mayendedwe anga asempha njira,
    ngati mtima wanga wakhumbira zimene maso anga aona,
    kapena ngati ndachita choyipa chilichonse.
⁸ Pamenepo ena adye zimene ndinadzala,
    ndipo zomera zanga zizulidwe.

⁹ “Ngati mtima wanga unakopekapo ndi mkazi,
    ndipo ngati ndinalakalaka mkazi wa mnansi wanga,
¹⁰ pamenepo mkazi wanga aphikire mwamuna wina chakudya,
    ndipo amuna ena azigona naye.
¹¹ Pakuti zimenezo zikanakhala zochititsa manyazi,
    tchimo loyenera kulangidwa nalo.
¹² Ndi moto umene umayaka mpaka chiwonongeko;
    ukanapsereza zokolola zanga.

¹³ “Ngati ndinkapondereza mlandu wa akapolo anga aamuna kapena aakazi,
    pamene ankabwera kwa ine ndi milandu yawo,
¹⁴ ndidzatani pamene Mulungu adzanditsutsa?
    Nanga ndidzayankha chiyani akadzandifunsa?
¹⁵ Kodi amene anapanga ine mʼmimba mwa amayi anga si yemwe anapanganso iwo?
    Kodi si mmodzi yemweyo amene anatipanga tonsefe mʼmimba mwa amayi athu?

¹⁶ “Ngati ndinawamana aumphawi zinthu zimene ankazikhumba,
    kapena kuwagwiritsa fuwa lamoto akazi amasiye amene amafuna thandizo kwa ine,
¹⁷ ngati chakudya changa ndinadya ndekha,
    wosagawirako mwana wamasiye,
¹⁸ chonsechotu kuyambira unyamata wanga ndinamulera monga abambo ake,
    ndipo moyo wanga wonse ndakhala ndikusamalira akazi amasiye,
¹⁹ ngati ndinaona wina aliyense akuzunzika ndi usiwa,
    kapena munthu wosauka alibe chofunda,
²⁰ ndipo ngati iyeyo sananditamandepo
    chifukwa chomufunditsa ndi nsalu ya ubweya wankhosa,
²¹ ngati ndinaopsezapo mwana wamasiye,
    poganiza kuti ndinali ndi mphamvu mʼbwalo la milandu,
²² pamenepo phewa langa lipokonyeke,
    mkono wanga ukonyoke polumikizira pake.
²³ Popeza ine ndinaopa kwambiri chiwonongeko chochokera kwa Mulungu,
    ndinachitanso mantha ndi ulemerero wake, sindikanatha kuchita zinthu zimenezi.

²⁴ “Ngati ndinayika mtima wanga pa chuma
    kapena kunena kwa golide wabwino kwambiri kuti, ‘Iwe ndiye chitetezo changa,’
²⁵ ngati ndinakondwera chifukwa choti chuma changa chinali chambiri,
    zinthu zimene manja anga anazipeza,
²⁶ ngati pamene ndinaona dzuwa likuwala,
    kapena mwezi ukuyenda mwa ulemerero wake,
²⁷ ndipo kuti mtima wanga unakopeka nazo
    nʼkuyika dzanja langa pakamwa mozilemekeza,
²⁸ pamenepo zimenezinso zikanakhala machimo oti ndilangidwe nawo,
    chifukwa ndikanakhala wosakhulupirika kwa Mulungu wakumwamba.

²⁹ “Ngati ndinasangalala ndi kuwonongeka kwa mdani wanga,
    kapena kusekera mavuto pamene mavuto anamugwera,
³⁰ ine sindinachimwe ndi pakamwa panga
    potulutsa matemberero a mdani wanga kuti awonongeke,
³¹ ngati anthu amene ndimakhala nawo mʼnyumba mwanga sananenepo kuti,
    ‘Kodi ndani amene sakhuta ndi chakudya cha Yobu?’
³² Komatu mlendo sindinamusiye pa msewu usiku wonse,
    pakuti khomo langa linali lotsekuka nthawi zonse kwa alendo,
³³ ngati ndinabisa tchimo langa monga amachitira anthu ena,
    kubisa kulakwa mu mtima mwanga
³⁴ chifukwa choopa gulu la anthu,
    ndi kuchita mantha ndi mnyozo wa mafuko
    kotero ndinakhala chete ndipo sindinatuluke panja.

³⁵ “Aa, pakanakhala wina wondimva!
    Tsopano ndikutsiriza mawu anga odzitetezera. Wamphamvuzonse andiyankhe;
    mdani wanga achite kulemba pa kalata mawu ake ondineneza.
³⁶ Ndithu ine ndikanakoleka kalatayo pa phewa langa,
    ndikanayivala kumutu ngati chipewa chaufumu.
³⁷ Ndikanamufotokozera zonse zimene ndinachita;
    ndikanafika pamaso pake ngati kalonga.

³⁸ “Ngati minda yanga ikulira monditsutsa ine
    ndipo malo ake onse osalimidwa anyowa ndi misozi,
³⁹ ngati ndinadya za mʼminda mwake osapereka ndalama
    kapena kukhumudwitsa anthu olima mʼmindamo,
⁴⁰ pamenepo mʼmindamo mumere namsongole mʼmalo mwa tirigu
    ndi udzu mʼmalo mwa barele.”