⁴ Adzamanganso mabwinja akale a mzinda
    ndipo malo amene anawonongeka kalekale aja adzakonzanso.
Adzakonzanso mizinda imene inapasuka,
    imene yakhala yowonongeka kwa nthawi yayitali kwambiri.
⁵ Anthu achilendo adzakutumikirani; adzazidyetsa ziweto zanu;
    iwo adzagwira ntchito mʼminda yanu ya mpesa.
⁶ Ndipo inu mudzatchedwa ansembe a Yehova,
    adzakutchulani kuti ndinu atumiki a Mulungu wathu.
Mudzadyerera chuma cha mitundu ya anthu,
    ndipo mudzanyadira ulemu umene mwalandira.

⁷ Chifukwa manyazi awo anali owirikiza;
    ndi kuti munalandira
chitonzo ndi kutukwana,
    adzakondwera ndi cholowa chawo,
tsono adzalandira cholowa chawo cha chigawo cha dziko mowirikiza,
    ndipo chimwemwe chamuyaya chidzakhala chawo.

⁸ “Pakuti Ine Yehova, ndimakonda chilungamo;
    ndimadana ndi zakuba ndi zoyipa.
Anthu anga ndidzawapatsa mphotho mokhulupirika
    ndikupangana nawo pangano losatha.
⁹ Ana awo adzakhala odziwika pakati pa mitundu ya anthu
    ndipo adzukulu awo adzakhala otchuka pakati pa anthu a mitundu ina.
Aliyense wowaona adzazindikira
    kuti ndi anthu amene Yehova wawadalitsa.”

¹⁰ Ine ndikusangalala kwambiri chifukwa cha Yehova;
    moyo wanga ukukondwera chifukwa cha Mulungu wanga.
Pakuti Iye wandiveka zovala zachipulumutso,
    ndipo wandiveka mkanjo wachilungamo.
Zili ngati mkwati wovala nkhata ya maluwa mʼkhosi mwake,
    ndiponso ngati mkwatibwi wovala mikanda yamtengowapatali.
¹¹ Monga momwe nthaka imameretsa mbewu
    ndiponso monga munda umakulitsa mbewu zimene anadzala,
momwemonso Ambuye Yehova adzaonetsa chilungamo ndi matamando
    pamaso pa mitundu yonse ya anthu.