A A A A A
Bible Book List

TITO 1Mam de Todos Santos Chuchumatán (MVJ)

Jun uˈj e xiˈ ttzˈiˈben apóstol Pablo te Tito

Jun kˈolbebl tuˈn Pablo te Tito

Inayena, Pablo, nxiˈ ntzˈiˈbena ja uˈj lu te tey, Tito. Jun t‑akˈanal Dios kena, bix tuj taakˈenxin, nchin ajbena te jun t‑xel Jesucristo. Jweya waakˈen, jaj tuˈn cyocslan xjal tiˈ Cristo bix tuˈn tel kniyˈ tiˈj kocslabl, ejooˈ t‑xjal Dios, bix ti tten tuˈn t‑xiˈ kiiˈn knaabl tisen taj Dios. Ejooˈ xjal ma txiˈ kiiˈn ja kocslabl lu, baˈntzen tuˈn kayon tiˈj jun kchunkˈlal mintiiˈ tbajlel, cuma cpomel baj Dios tyol tiˈ. Mixbe ẍtakˈenxin. Tej mitknaˈx tbint twitz txˈotxˈ, e tkba Dios tuˈn t‑xiˈ tkˈoˈnxin cychunkˈlal cye t‑xjalxin te junx maj. Bix tej tpon tumel, e tzaj tyeecˈanxin j‑e baj tnincˈuˈnxin tuj tneel. Bix cyxol ke tyolelxin nejl te ja tyolxin lu, ma takˈxin weya tuˈn t‑xiˈ npocbaˈna. Ja te Dios, Clol ke, ma tkba weya tuˈn t‑xiˈ nkˈumena.

Tey, Tito, tisen ncwaltey, bix jun ncwala jaxxix, cuma junx kocslabl bix baˈntzen txiˈ lpey tiˈj j‑e xiˈ nxnakˈtzaˈna tey. Tzajxit cyxtalbil Kman Dios tuyax Kaaw Jesucristo tibaja, bix tzajxit kˈaˈben cycˈuˈjxin tiˈja, bix tzajxit cykˈoˈnxin tuˈn ttena tuj ttz̈yal.

Jun taakˈen Tito tuj txˈotxˈ te Creta

E cyaj nkˈoˈna jay tuj txˈotxˈ te Creta, cuma e wajbeˈya tuˈn tonena cyiˈj ocslal tuˈn t‑xiˈ cyiiˈn cychunkˈlal tuj tumel, cuma at‑x chˈintl tuˈn tbint cyuˈna, bix tuˈn tetz tscyˈoˈna juun cawel tuj jaca juun tnom tuˈn tcyaj cynincˈuˈn cyxol ocslal, tisen e nkbaya tey nejl. Alcyekej xjal ma tzˈetz tscyˈoˈna tuˈn cyoc te cawel cyuj tja Dios, il tiˈj tuˈn t‑xiˈ cyiiˈn cychunkˈlal tujxix tumel, tuˈntzen min‑al kaˈ tyol cyiˈjxin. Chi cwelxix tenxin tuj tbanel tuya cyxuˈlxin. Bix chi xeˈl lpe cycwalxin tiˈ Dios, yaaˈn tiˈj nuk tikˈch taj cyxumlalkˈa. Bix miˈn chi kˈojkˈa tiˈ cymankˈa, tuˈntzen miˈn yolj cyuˈn xjal cyiˈjkˈa. Kej cawel cyxol ocslal, cuma chi oquelxin te t‑akˈanal Dios, juˈ tzunj il tiˈj cxeˈl cyiiˈnxin cychunkˈlalxin jiquenxix, tuˈntzen mintiiˈ kaˈ yol cyuˈn xjal cyiˈjxin. Yaaˈnt lo kej xin iyˈnen tibaj cynaabl. Miˈn jaw cykˈojxin tuj ajkelbil. Mitetpe tuˈn cyocxin bola. Miˈn tzˈoc cypjuˈnxin ke xjal. Yaaˈnt lo kej xin nuk cyaj tuˈn cycaman pwak. Scyˈonwe kej ocslal nchi kˈon posada bix waabj oj cypon xjal cyja, bix tuya cykil cycˈuˈjxin cbinel jbaˈn cyuˈnxin. Cwelxix cytzyun cyiibxin twitzj kaˈ. Chi temelxin jiquenxix twitz Dios bix cywitz xjal. Cxeˈl cyiiˈnxin cynaablxin tisen taj Dios. Miˈn cyjoyxin tuˈn cybinchanxin tkaˈyel. Il tiˈj tuˈn cytenxin cyiw tuj jjaxxix xnakˈtzbil e kˈoj cyexin, tuˈntzen t‑xiˈ cyxnakˈtzaˈnxin alcyej jaxxix cye niyˈtl ocslal, bix tuˈn tcub cyiˈj kej tzpetsal cyuˈnxin oj nchi kˈojl cyiˈjxin.

10 Hermano, ilxsen tiˈj tuˈn tcub tkˈoˈna cyxol ocslal ejeeˈj at cynaabl, cuma at nim xjal cyxola cycyˈi chi ocx tjakˈ cawbil cyuj tja Dios. At xjal mintiiˈ tajbel cyxnakˈtzbil bix sbul xjalke. Cyxol kej nchi sbun juˈwa, mas ncnet kej xjal judío cyxol. 11 Il tiˈj tuˈn tmaket cytzi kej tzpetsal lu, cuma tuˈnj cyxnakˈtzbilxin yaaˈn tumel, nxiˈ cyocslabl xjal tuj il cyuˈnxin. At maj entera ocslal tuj jun jaaˈ nchi tzpet tuj cyocslabl cyuˈnxin. Bix nchi kˈonxin cyxnakˈtzbilxin takˈ nuk tuˈn cycamanxin pwak cyiˈj ocslal. Jun chˈixbajil jlu.

12 Hermano, at nim il tiˈj tuˈn cycawen ke cawel cyiw tuj cyocslabl cyibaj ocslal tuj Creta. At jun maj e xiˈ tkbaˈn jun nintzaj aj Creta at tnaabl cyjulu: “Ejooˈ aj Creta jun wik xjal nuk nko ẍtakˈen. Tisen xoˈj koˈ. Cyˈaj xjal koˈ, bix nko kˈon kiib nuk tuˈn tnoj kcˈuˈj,” tz̈ixin, bix tex Cretaxin. 13 Jax tuˈnxin. Juˈ tzunj, cˈoquel ilen chˈina cyiˈ ocslal, tuˈntzen cytenxin cyiw tuj cyocslablxin tiˈj Cristo. 14 Xnakˈtzanxa baˈn, tuˈn miˈntl txiˈ cybiˈnxin cyxnakˈtzbil judío yaaˈn jaxxix, bix tuˈn miˈntl cynimanxin cyley kej xjal n‑el cypaˈn cyiib tiˈj jaxxix yol. 15 Cyxol xjal at jun yol tzin tkbaˈn cyjulu: “Kej xjal sakxix tuj cyanem, sak taˈ cykilca tuj cywitzxin,” tz̈i yol. Pero kej xjal yaaˈn sak tuj cyanem, ejeeˈj min chi ocslan tiˈ Cristo tuˈn cyclet, cykilca n‑oc cykˈoˈn te yaaˈn baˈnj tuˈn tbint bix tuˈn t‑xiˈ cywaaˈn. Mlay tzˈel cyniyˈ tiˈj alcyej baˈn, cuma tzˈilx cynaablxin bix cyanemxin. 16 Tzin cykbaˈnxin ka cytzkiˈnxin Dios, pero tuˈnj kaˈ nbint cyuˈnxin, tzinen taˈ nuk ten cyuˈnxin. Kaˈkexin twitz Dios. Min chi nimanxin Dios. Mlay chi ajbenxin te Dios tuˈn tbint jun akˈuntl baˈn cyuˈnxin.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes