Salmo 91-93

Ang Salita ng Dios (Tagalog Contemporary Bible)

91 Ang sinumang nananahan sa piling ng Kataas-taasang Dios na Makapangyarihan ay kakalingain niya.
² Masasabi niya^[a] sa Panginoon, “Kayo ang kumakalinga sa akin at nagtatanggol.
    Kayo ang aking Dios na pinagtitiwalaan.”
³ Tiyak na ililigtas ka niya sa bitag ng masasama at sa mga nakamamatay na salot.
⁴ Iingatan ka niya gaya ng isang ibong iniingatan ang kanyang mga inakay sa lilim ng kanyang pakpak.
    Iingatan ka at ipagtatanggol ng kanyang katapatan.
^5-6 Hindi ka dapat matakot sa mga bagay na nakakatakot,
    o sa palaso ng mga kaaway, o sa sakit at mga salot na sumasapit sa gabi man o sa araw.
⁷ Kahit libu-libo pa ang mamatay sa paligid mo, walang mangyayari sa iyo.
⁸ Makikita mo kung paano pinaparusahan ang mga taong masama.
⁹ Dahil ginawa mong kanlungan ang Panginoon, ang Kataas-taasang Dios na aking tagapagtanggol,
¹⁰ walang kasamaan, kalamidad o anumang salot ang darating sa iyo o sa iyong tahanan.
¹¹ Dahil uutusan ng Dios ang kanyang mga anghel upang ingatan ka saan ka man magpunta.
¹² Bubuhatin ka nila upang hindi masugatan ang iyong mga paa sa bato.^[b]
13 Tatapakan mo ang mga leon at mga makamandag na ahas.
¹⁴ Sinabi ng Dios, “Ililigtas ko at iingatan ang umiibig at kumikilala sa akin.
¹⁵ Kapag tumawag siya sa akin, sasagutin ko siya;
    sa oras ng kaguluhan, sasamahan ko siya.
    Ililigtas ko siya at pararangalan.
¹⁶ Bibigyan ko siya ng mahabang buhay at ipapakita ko sa kanya ang aking pagliligtas.”

92 Kataas-taasang Dios na Panginoon namin, napakabuting magpasalamat at umawit ng papuri sa inyo.
² Nakalulugod na ipahayag ang inyong pag-ibig at katapatan araw at gabi,
³ habang tumutugtog ng mga instrumentong may kwerdas.
⁴ Dahil pinasaya nʼyo ako, Panginoon, sa pamamagitan ng inyong kahanga-hangang mga gawa.
    At dahil dito, akoʼy umaawit sa tuwa.
⁵ Panginoon, kay dakila ng inyong mga ginawa.
    Ang isipan nʼyoʼy hindi namin kayang unawain.
⁶ Hindi maunawaan ng mga hangal at matitigas ang ulo
⁷ na kahit umunlad ang taong masama gaya ng damong lumalago,
    ang kahahantungan pa din niya ay walang hanggang kapahamakan.
⁸ Ngunit kayo, Panginoon, ay dakila sa lahat magpakailanman.
⁹ Tiyak na mamamatay ang lahat ng inyong kaaway at mangangalat ang lahat ng gumagawa ng masama.
¹⁰ Pinalakas nʼyo ako na tulad ng lakas ng lakas ng toro
    at binigyan nʼyo rin ako ng kagalakan.^[c]
11 Nasaksihan ko ang pagkatalo ng aking mga kaaway,
    at narinig ko ang pagdaing ng masasamang kumakalaban sa akin.
¹² Uunlad ang buhay ng mga matuwid gaya ng mga palma,
    at tatatag na parang puno ng sedro na tumutubo sa Lebanon.
¹³ Para silang mga punong itinanim sa templo ng Panginoon na ating Dios,
¹⁴ lumalago at namumunga kahit matanda na,
    berdeng-berde ang mga dahon at nananatiling matatag.
¹⁵ Ipinapakita lamang nito na ang Panginoon, ang aking Bato na kanlungan ay matuwid.
    Sa kanyaʼy walang anumang kalikuan na matatagpuan.

93 Kayo ay hari, Panginoon;
    nadadamitan ng karangalan at kapangyarihan.
    Matatag ninyong itinayo ang mundo kaya hindi ito mauuga.
² Ang inyong trono ay naitatag na simula pa noong una,
    naroon na kayo noon pa man.
³ Panginoon, umuugong ang dagat at nagngangalit ang mga alon.
⁴ Ngunit Panginoong nasa langit, higit kayong makapangyarihan kaysa sa mga nagngangalit na alon.
⁵ Mapagkakatiwalaan ang inyong mga utos Panginoon,
    at ang inyong temploʼy nararapat lamang na ituring na banal magpakailanman.