Salmo 18:30-36

Ang Salita ng Dios (Tagalog Contemporary Bible)

³⁰ Ang pamamaraan nʼyo, O Dios ay walang kamalian.
    Ang inyong mga salita ay maaasahan.
    Kayoʼy katulad ng isang kalasag sa mga naghahanap ng kaligtasan^[a] sa inyo.
³¹ Kayo lang, Panginoon, ang tunay na Dios, at wala nang iba.
    At kayo lang talaga ang aming batong kanlungan.
³² Kayo ang nagbibigay sa akin ng kalakasan,
    at nagbabantay sa aking daraanan.
³³ Pinatatatag nʼyo ang aking paa tulad ng paa ng usa,
    upang maging ligtas ang pag-akyat ko sa matataas na lugar.
³⁴ Sinasanay nʼyo ako sa pakikipaglaban, tulad ng pagbanat ng matibay na pana.
³⁵ Ang katulad nʼyo ay kalasag na nag-iingat sa akin.
    Inaakay nʼyo ako sa pamamagitan ng inyong kapangyarihan,
    at dahil sa tulong nʼyo, naging tanyag ako.
³⁶ Pinaluwang nʼyo ang aking dadaanan,
    kaya hindi ako natitisod.