⁹ Paano mapapanatili ng isang kabataan na maging malinis ang kanyang buhay?
    Mamuhay siya ayon sa inyong mga salita.
¹⁰ Buong puso akong lumalapit sa inyo;
    kaya tulungan nʼyo akong huwag lumihis sa inyong mga utos.
¹¹ Ang salita nʼyo ay iningatan ko sa aking puso upang hindi ako magkasala sa inyo.
¹² Purihin kayo Panginoon!
    Ituro nʼyo sa akin ang inyong mga tuntunin.
¹³ Paulit-ulit kong sinasabi ang mga kautusang ibinigay ninyo.
¹⁴ Nagagalak akong sumunod sa inyong mga katuruan,
    higit pa sa kagalakang dulot ng mga kayamanan.
¹⁵ Ang inyong mga tuntunin ay aking pinagbubulay-bulayan
    at iniisip kong mabuti ang inyong pamamaraan.

¹⁶ Magagalak ako sa inyong mga tuntunin,
    at ang inyong mga salitaʼy hindi ko lilimutin.
¹⁷ Ipadama nʼyo ang inyong kabutihan sa akin na inyong lingkod,
    upang patuloy akong makasunod at makapamuhay ng ayon sa inyong salita.

⁹⁷ Iniibig ko ang inyong kautusan.
    Palagi ko itong pinagbubulay-bulayan.
⁹⁸ Ang mga utos nʼyo ay nasa puso ko,
    kaya mas marunong ako kaysa sa aking mga kaaway.
⁹⁹ Mas marami ang aking naunawaan kaysa sa aking mga guro,
    dahil ang lagi kong pinagbubulay-bulayan ay ang inyong mga turo.
¹⁰⁰ Higit pa ang aking pang-unawa kaysa sa matatanda,
    dahil sinusunod ko ang inyong mga tuntunin.
¹⁰¹ Iniiwasan ko ang masamang pag-uugali,
    upang masunod ko ang inyong mga salita.
¹⁰² Hindi ako lumihis sa inyong mga utos,
    dahil kayo ang nagtuturo sa akin.
¹⁰³ Kay tamis ng inyong mga salita, mas matamis pa ito kaysa sa pulot.
¹⁰⁴ Sa pamamagitan ng inyong mga tuntunin,
    lumalawak ang aking pang-unawa,
    kaya kinamumuhian ko ang lahat ng gawaing masama.

¹⁰⁵ Ang salita nʼyo ay katulad ng ilaw na nagbibigay-liwanag sa aking dadaanan.