Salmo 107:23-32

Ang Salita ng Dios (Tagalog Contemporary Bible)

²³ May mga taong sumakay sa mga barko at nagbiyahe sa karagatan, dahil ito ang kanilang hanapbuhay.
²⁴ Nakita nila ang kahanga-hangang mga gawa ng Panginoon sa karagatan.
²⁵ Sa utos ng Panginoon, ang hangin ay lumakas at lumaki ang mga alon.
²⁶ Kaya pumapaitaas ang kanilang barko nang napakataas at pumapailalim.
    At silaʼy nangatakot sa nagbabantang kapahamakan.
²⁷ Silaʼy susuray-suray na parang mga lasing,
    at hindi na alam kung ano ang gagawin.
²⁸ Sa kanilang kagipitan, tumawag sila sa Panginoon,
    at silaʼy iniligtas niya mula sa kapahamakan.
²⁹ Pinatigil niya ang malakas na hangin at kumalma ang dagat.
³⁰ At nang kumalma ang dagat, silaʼy nagalak,
    at pinatnubayan sila ng Dios hanggang sa makarating sila sa nais nilang daungan.
³¹ Kaya dapat silang magpasalamat sa Panginoon,
    dahil sa pag-ibig niya at kahanga-hangang gawa sa mga tao.
³² Dapat nilang parangalan ang Dios sa kanilang pagtitipon,
    at purihin siya sa pagtitipon ng mga namamahala sa kanila.