Salmo 66

Ang Pulong Sa Dios

⁵ Dali kamo! Tan-awa ninyo ang katingalahang gipanghimo sa Dios alang sa mga tawo.
⁶ Gipamala niya ang dagat;
ug gitabok sa atong mga katigulangan ang suba nga naglakaw lang.
Tungod niadtong gihimo sa Dios, maglipay kita.
⁷ Nagahari siya sa walay kataposan pinaagi sa iyang gahom,
ug gipanid-an niya ang kanasoran.
Kinahanglan ang mga gahig ulo dili magpasigarbo sa ilang kaugalingon.
⁸ Mga katawhan, dayega ninyo ang Dios!
Ipalanog ang inyong pagdayeg kaniya.
⁹ Gitipigan niya ang atong kinabuhi;
ug wala niya itugot nga malaglag kita.
¹⁰ Sa pagkatinuod, gisulayan mo kami, O Dios;
gihinloan mo kami sama sa pilak nga giputli pinaagi sa kalayo.
¹¹ Mitugot ka nga mahulog kami sa lit-ag,
ug gipapas-an mo kami sa bug-at nga mga palas-anon.
¹² Gipayatak-yatakan mo kami sa among mga kaaway;
nagaantos kami nga daw sa nasunogan o gibahaan.
Apan karon gidala mo kami sa dapit sa kadagaya.
¹³ Maghalad ako sa imong templo ug mga halad nga sinunog.
Tumanon ko ang akong mga saad
¹⁴ nga gihimo ko nganha kanimo sa diha pa ako sa kalisod.
¹⁵ Mohalad ako kanimo ug tambok nga mga hayop sama sa karnero, torong baka, ug kanding isip halad nga sinunog.

¹⁶ Dali kamo ug pamati, kamong tanan nga nagatahod sa Dios,
kay sultihan ko kamo kon unsa ang iyang gihimo alang kanako.
¹⁷ Nangayo ako ug tabang kaniya ug gidayeg ko siya.
¹⁸ Kon wala ko pa isulti ang akong mga sala wala unta namati ang Ginoo kanako.
¹⁹ Apan namati gayod ang Dios kanako;
gidungog niya ang akong pag-ampo.
²⁰ Dalaygon ang Dios, kay wala niya ipakawalay-bili ang akong pag-ampo,
ug wala niya ihikaw ang iyang gugma kanako.