Salmo 135

Ang Pulong Sa Dios

⁵ Nakahibalo ako nga ang Ginoo gamhanan;
labaw siya sa tanang mga dios.
⁶ Gihimo sa Ginoo ang bisan unsa nga iyang gusto didto sa langit, sa yuta, sa mga kadagatan, ug sa kahiladman niini.
⁷ Siya ang nagmando nga mopaibabaw ang mga panganod gikan sa kinatumyan sa kalibotan,
ug nagpadala siya ug mga kilat uban sa ulan.
Ug gipagawas niya ang hangin gikan sa ilang tipiganan.
⁸ Gipamatay niya ang mga kamagulangang anak nga lalaki sa mga Ehiptohanon,
ingon man ang unang anak sa ilang mga mananap.
⁹ Didto sa Ehipto, naghimo siya ug mga milagro ug katingalahang mga butang sa pagsilot sa hari sa Ehipto^[b] ug sa tanang opisyal niini.
¹⁰ Gipanglaglag niya ang daghang mga nasod,
ug gipamatay niya ang gamhanang mga hari,
¹¹ sama kang Sihon nga hari sa mga Amorihanon, kang Og nga hari sa Basan, ug ang tanang mga hari sa Canaan.
¹² Ug gihatag niya ang ilang yuta sa iyang katawhan nga mga Israelinhon aron ilang panag-iyahan.

¹³ Ginoo, ang imong ngalan ug ang imong pagkabantogan hinumdoman hangtod sa kahangtoran.
¹⁴ Kay pamatud-an mo, Ginoo, nga walay sala ang imong katawhan nga imong mga alagad,
ug kaloy-an mo sila.
¹⁵ Ang mga dios-dios sa ubang mga nasod hinimo lang sa tawo gikan sa pilak ug bulawan.
¹⁶ May mga baba kini, apan dili makasulti,
may mga mata, apan dili makakita,
¹⁷ may mga dalunggan, apan dili makadungog,
ug wala kini gininhawa.
¹⁸ Ang mga tawo nga naghimo niini nga mga dios-dios
ug ang tanang nagasalig kanila mahimong sama kanila.

^19-20 Kamong katawhan sa Israel, apil na kamong mga kaliwat ni Aaron, ug uban pang mga kaliwat ni Levi, dayega ninyo ang Ginoo!
Kamong nagatahod sa Ginoo, dayega ninyo siya!
²¹ Dayega ang Ginoo nga anaa sa Zion, ang Jerusalem nga iyang pinuy-anan.

Dayega ang Ginoo!