Salmo 114

Ang Salita ng Dios (Tagalog Contemporary Bible)

114 Nakatira noon ang mga taga-Israel na lahi ni Jacob sa Egipto,
    na kung saan iba ang wika ng mga tao.
² Nang papalabas na sila sa Egipto, ginawa ng Dios na banal na lugar ang Juda,
    at ang Israel ay kanyang pinamunuan.
³ Ang Dagat na Pula ay nahawi at ang Ilog ng Jordan ay tumigil sa pag-agos.
⁴ Nayanig ang mga bundok at burol,
    na parang mga lumulundag na kambing at mga tupa.
⁵ Bakit nahawi ang Dagat na Pula,
    at tumigil sa kanyang pag-agos ang Ilog ng Jordan?
⁶ Bakit nayayanig ang mga bundok at mga burol,
    na parang lumulundag na mga kambing at tupa?
⁷ Nayayanig ang mundo sa presensya ng Panginoong Dios ni Jacob,
⁸ na siyang gumawa sa matigas na bato upang maging imbakan ng tubig at naging bukal na umaagos.