A A A A A
Bible Book List

SANTIAGO 4Mam de Todos Santos Chuchumatán (MVJ)

Yaaˈn baˈn tuˈn kxiˈ lpe tiˈj tikˈch at twitz txˈotxˈ

¿Tikentzen n‑el cyiiqˈuen cyiiba bix nchi kˈojla? At kˈoj cyxola tuˈn tlaj cyexa cyajbila. Jtaj cynaabla aj il nkˈojl tiˈj cynaabla ma tzaj tkˈoˈn Dios. N‑oc cykˈaˈbena tikˈch cye cyuyey, pero min ncnet cyuˈna. Ncub cybyoˈna xjal, bix nuk nchi jyona cyexa cyajbila, pero min ncnet cyuˈna. Nchiˈlec cycˈuˈja cyiˈ juntl, bix at nim kˈoj cyxola. N‑oc cyipena tiˈj tuˈn tcnet cyuˈnxa, pero min txiˈ cykanena te Dios. Juˈ tzunj, mintiiˈ ma kˈoj cyey tuˈn. Oj nchi naˈna Dios, min txiˈ cykanena texin ti tten tuˈn cyajbena texin. Nuk nchi kˈumena texin ti cyaja. Juˈ tzunj, mintiiˈ ma kˈoj cyey. Oj cyaja nuk cyexa cyajbila bix yaaˈnj te Dios, juˈ key tisen jun xuuj at tchmil pero nxiˈ ttziyan juntl xinak. ¿Mimpa tzˈel cyniˈya tiˈj ka ma pon cycˈuˈja nuk tiˈj tikˈch at twitz txˈotxˈ, nchi kˈojl tzuna tiˈ Dios? Juˈ tzunj, alcyej xjal taj tuˈn t‑xiˈ lpe tiˈj tikˈch at twitz txˈotxˈ, n‑oc tkˈon tiib te aj kˈoj tiˈ Dios. ¿Ti toc cyuˈna? ¿Nukpa tajx nbyan tuj tyol Dios nim taj Dios tuˈn kten nuk te texin? Min. E bint koˈ tuˈnxin te texin. Bix at mas tipemal Dios twitzj tipemal knaabl aj il, bix taj Dios ko tzaj tonen. Juˈ tzunj, tzin tkbaˈn tyol Dios cyjulu: “At tkˈoj Dios cyiˈj ke xjal nuk nbaj cyniman cyiib, pero kej xjal n‑oc cykˈon cyiib te chˈin, tzin tkˈoˈn Dios t‑xtalbil cye,” tz̈i tyol Dios.

Juˈ tzunj, miˈn chi nimana tajbil taaw il, sino cykˈonx cyiiba tjakˈ tcawbil Dios. Ka ma chi weˈxixa twitz taaw il, qˈueleltzen lkˈe cyiˈja. Ka ma chi tzaj lkˈey tiˈ Dios, jax ctzaal lkˈe cyuyey. Key ma chi binchan il, miˈn tzˈajbentl cykˈaba tuˈn tbint mas kaˈ tuˈn. Bix key at caˈba twiˈ cyanem, miˈn cheˈx lpey tiˈj tikˈch at twitz txˈotxˈ. Cytxjoma cyanema. Tuˈn t‑xiˈ cyyeecˈana ka ma cyaj cykˈoˈna kaˈ, chi bisena bix chi okˈa. Tzˈocxit cytzebla te cyookˈbila bix cytzalajebla te bisbajil. 10 Ka ma tzˈoc cykˈon cyiiba te chˈin twitz Dios, ctzaaltzen tkˈoˈnxin cyey tuˈn cyoca te nim.

Yaaˈn baˈn tuˈn kyole kaˈ tiˈ juntl ocslal

11 Key ocslal, miˈn chi yolena kaˈ tiˈ juntl ocslal cyxola. Ka ma chi yolena kaˈ tiˈj juntl ocslal, nchi kˈojl tzuna tiˈj jtzin tkbaˈn ley, bix juˈ tzunj tzin cykbaˈna at mas cynaabla twitz ley. Ka ma chi iˈya tibaj ley juˈwa, yaaˈntzen eteˈy tjakˈ tley Dios, sino ma chi oca kˈolte ley tisen Dios. 12 Pero junx Kˈolte ley at, bix jaxin kbalte ka baˈn bix ka kaˈ ma bint tuˈn jun xjal. Yaaˈn ejeeˈy chi kbalte alcye kej xjal chi cletel bix alcye kej xjal chi xeˈl tuj kˈakˈ, sino jaxin.

Miˈn ko bisen tiˈj ti pjel nchiˈj

13 Jaˈlewe at jun tumel cxeˈl nkbaˈna cyej xjal cyxola min nchi ximan tiˈ Dios. Tzin cykbaˈn cyjulu: “Jaˈlewe bix ka nchiˈj ko xeˈl tuj jun tnom. Ko temel jun jnabkˈi tuˈn kqˈueyen bix tuˈn kcaman nim pwak,” tz̈ike. 14 Pero mintiiˈ tumel cyuyey ti pjel tuj cychunkˈlala nchiˈj. Jkchunkˈlal tisen chˈin muj tuj nuk jun rato n‑el naj. 15 Mas baˈn tuˈn cykbantiya cyjulu: “Ka ma tzaj tkˈoˈntl Dios kchunkˈlal, ckbinchaˈtzen jlu bix ka jaj lu,” tz̈i cybela. 16 Pero jaˈlewe, min txiˈ cykbaˈna juˈwa, sino ncub cynicˈuˈna cychunkˈlala bix min txiˈ cyxiˈmana tiˈj ka ma tzaj tkˈoˈn Dios cykˈija. Pero yaaˈn baˈn njaw cyniman cyiiba. 17 Juˈ tzunj, n‑el cyniˈya tiˈj alcyej baˈn tuˈn tbint cyuˈna, bix ka min ma bint cyuˈna, attzen cyila tiˈj.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes