Psalmi 115 Biblia Sacra Vulgata (VULGATE)

115 alleluia credidi propter quod locutus sum ego autem humiliatus sum nimis

² ego dixi in excessu meo omnis homo mendax

³ quid retribuam Domino pro omnibus quae retribuit mihi

⁴ calicem salutaris accipiam et nomen Domini invocabo

⁵ vota mea Domino reddam coram omni populo eius

⁶ pretiosa in conspectu Domini mors sanctorum eius

⁷ o Domine quia ego servus tuus ego servus tuus et filius ancillae tuae disrupisti vincula mea

⁸ tibi sacrificabo hostiam laudis et in nomine Domini invocabo

⁹ vota mea Domino reddam in conspectu omnis populi eius

¹⁰ in atriis domus Domini in medio tui Hierusalem