Salmo 119:17-32

Ang Pulong Sa Dios

¹⁷ Pakitai ako, nga imong alagad, sa imong kaayo
aron padayon akong magkinabuhi ug motuman sa imong pulong.
¹⁸ Ablihi ang akong hunahuna
aron masabtan ko ang matahom nga mga kamatuoran diha sa imong kasugoan.
¹⁹ Lumalabay lamang ako niining kalibotana,
busa ipadayag kanako ang imong mga sugo.
²⁰ Sa tanang panahon nagahandom gayod ako sa pagsabot sa imong kasugoan.
²¹ Gibadlong mo ang mga garboso, nga imong tinunglo.
Kini sila mitalikod sa imong mga sugo.
²² Ilikay ako sa ilang pagpakaulaw ug pagbiaybiay,
kay gituman ko ang imong mga katudloanan.
²³ Bisan pag magtigom ang mga pangulo sa paglibak kanako,
ako nga imong alagad, mamalandong sa imong mga tulumanon.
²⁴ Ang imong mga pagtulon-an nagahatag kanako ug kalipay;
mao kini ang nagahatag kanako ug tambag.

²⁵ Daw sa mamatay na ako, busa lugwayi pa ang akong kinabuhi sumala sa imong saad.
²⁶ Gisugilon ko kanimo ang akong mga binuhatan ug naminaw ka kanako.
Tudloi ako sa imong mga tulumanon.
²⁷ Pasabta ako sa imong mga tulumanon
aron mapamalandongan ko ang imong mga katingalahang buhat.
²⁸ Daw sa makuyapan na ako tungod sa kasubo,
busa lig-ona ako sumala sa imong saad.
²⁹ Kuhaa kanako ang pagkamalimbongon;
ug kaloy-i ako ug tudloi sa imong kasugoan.
³⁰ Gipili ko ang pagkamatinumanon;
ug tumanon ko ang imong mga lagda.
³¹ Gisunod ko, Ginoo, ang imong mga katudloanan,
busa ayaw itugot nga maulawan ako.
³² Gitinguha ko gayod ang pagtuman sa imong mga sugo
tungod kay gidugangan mo ang akong panabot.^[a]