Salmo 119:129-152

Ang Pulong Sa Dios

¹²⁹ Pagkaanindot gayod sa imong mga katudloanan,
busa gisunod ko kini sa tibuok kong kasingkasing.
¹³⁰ Ang pagpadayag sa imong mga pulong nagahatag ug kahayag sa hunahuna sa mga tawo
ug kaalam sa mga walay alamag.
¹³¹ Nangandoy gayod ako pag-ayo sa imong mga sugo.
¹³² Tagda ako ug kaloy-i sama sa imong ginahimo kanunay sa mga nagahigugma kanimo.
¹³³ Giyahi ako pinaagi sa imong pulong;
ayaw itugot nga gamhan ako sa daotan.
¹³⁴ Luwasa ako sa mga nagadaog-daog kanako,
aron matuman ko ang imong mga tulumanon.
¹³⁵ Ipakita ang imong kaayo kanako nga imong alagad,
ug tudloi ako sa imong mga tulumanon.
¹³⁶ Gahilak ako sa hilabihan tungod kay dili gatuman ang mga tawo sa imong balaod.

¹³⁷ Matarong ka, Ginoo, ug husto ang imong mga sugo.
¹³⁸ Matarong ug kasaligan gayod ang mga katudloanan nga imong gihatag.
¹³⁹ Nasuko gayod ako sa hilabihan kay gisalikway sa akong mga kaaway ang imong mga pulong.
¹⁴⁰ Tinuod gayod nga kasaligan ang imong saad,
ug ako nga imong alagad nahigugma niini.
¹⁴¹ Bisan ubos ako ug tinamay, wala ko kalimti ang imong mga tulumanon.
¹⁴² Walay kataposan ang imong pagkamatarong
ug tinuod ang imong balaod.
¹⁴³ Miabot kanako ang kalisod ug kasakit,
apan ang imong mga sugo naghatag kanako ug kalipay.
¹⁴⁴ Matarong ang imong mga katudloanan sa walay kataposan.
Hatagi ako ug panabot aron padayon akong magkinabuhi.

¹⁴⁵ Nagatawag ako kanimo, Ginoo, sa tibuok kong kasingkasing;
tubaga ako, ug tumanon ko ang imong mga tulumanon.
¹⁴⁶ Nagatawag ako kanimo;
luwasa ako, ug tumanon ko ang imong mga katudloanan.
¹⁴⁷ Nagabangon na ako sa wala pa mosidlak ang adlaw ug gapangayo ug tabang kanimo,
kay nagasalig ako sa imong saad.
¹⁴⁸ Gatukaw ako tibuok gabii aron sa pagpamalandong sa imong pulong.
¹⁴⁹ Pamatia ako, Ginoo, sumala sa imong gugma;
tipigi ang akong kinabuhi sumala sa imong nga paghukom.^[a]
150 Nagpaduol kanako ang mga daotan nga naglutos kanako, ug nagsalikway sa imong balaod.
¹⁵¹ Apan duol ka kanako, Ginoo;
ug kasaligan^[b] ang tanan mong mga sugo.
¹⁵² Sa akong pagtuon sa imong mga katudloanan, dugay ko nang nahibaloan nga kining imong mga katudloanan palungtaron mo hangtod sa kahangtoran.