Salmo 119:113-128

Ang Pulong Sa Dios

¹¹³ Gikapungtan ko ang mga tawo nga taphaw ang pag-alagad kanimo,
apan gihigugma ko ang imong kasugoan.
¹¹⁴ Ikaw ang akong tagoanan ug salipdanan;
nagasalig ako sa imong pulong.
¹¹⁵ Pahilayo kamo kanako, kamong mga nagahimo ug daotan,
aron matuman ko ang mga sugo sa akong Dios.
¹¹⁶ Hatagi akog kusog sumala sa imong saad,
aron padayon akong magkinabuhi.
Ug ayaw itugot nga mapakyas ako sa akong paglaom kanimo.
¹¹⁷ Tabangi ako aron walay daotang mahitabo kanako,
ug itutok ko kanunay ang akong hunahuna sa imong mga tulumanon.
¹¹⁸ Ginasalikway mo ang tanang nagasalikway sa imong mga tulumanon.
Sa pagkatinuod, ang ilang pagpanglimbong walay kapuslanan.
¹¹⁹ Gisalikway mo nga daw mga basura ang tanang mga tawong daotan dinhi sa kalibotan.
Tungod niini gihigugma ko ang imong katudloanan.
¹²⁰ Nagkurog ako sa kahadlok kanimo;
nahadlok gayod ako sa imong paghukom.^[a]

¹²¹ Gihimo ko ang matarong ug husto,
busa ayaw ako itugyan sa akong mga kaaway.
¹²² Pasaligi ako nga tabangan mo ako nga imong alagad;
ayaw itugot nga daog-daogon ako sa mga mapahitas-on.
¹²³ Mingitngit na ang akong panan-aw ug hinulat sa imong saad nga ako imong luwason.
¹²⁴ Buhata sa imong alagad ang angayan alang kaniya sumala sa imong gugma,
ug tudloi ako sa imong mga tulumanon.
¹²⁵ Alagad mo ako, busa hatagi ako ug panabot
aron masabtan ko ang imong mga katudloanan.
¹²⁶ Ginoo, panahon na kini nga molihok ka,
kay wala na mituman ang mga tawo sa imong kasugoan.
¹²⁷ Tungod kay gihigugma ko ang imong mga sugo labaw pa sa bulawan, bisan pa sa lunsayng bulawan,
¹²⁸ ug tungod kay gisunod ko ang tanan mong mga tulumanon,
gikapungtan ko ang tanang daotang buhat.