² Chifukwa chiyani anthu a mitundu ina akunena kuti,
    “Mulungu wawo ali kuti?”
³ Mulungu wathu ali kumwamba;
    Iye amachita chilichonse chimene chimamukondweretsa.
⁴ Koma mafano awo ndi siliva ndi golide,
    opangidwa ndi manja a anthu.
⁵ Pakamwa ali napo koma sayankhula,
    maso ali nawo koma sapenya;
⁶ makutu ali nawo koma samva,
    mphuno ali nazo koma sanunkhiza;
⁷ manja ali nawo koma akakhudza samva kanthu;
    mapazi ali nawo koma sayenda;
    kapena pakhosi pawo kutulutsa mawu.
⁸ Anthu amene amapanga mafanowo adzafanana nawo,
    chimodzimodzinso onse amene amadalira mafanowo.

⁹ Inu Aisraeli, dalirani Yehova;
    Iye ndiye thandizo lanu ndi chishango chanu.
¹⁰ Iwe nyumba ya Aaroni, dalira Yehova;
    Iye ndiye thandizo lako ndi chishango chako.
¹¹ Inu amene mumaopa Iye, dalirani Yehova;
    Iye ndiye thandizo lanu ndi chishango chanu.

¹² Yehova watikumbukira ndipo adzatidalitsa:
    adzadalitsa nyumba ya Israeli,
    adzadalitsa nyumba ya Aaroni,
¹³ adzadalitsa iwo amene amaopa Yehova;
    aangʼono ndi aakulu omwe.

¹⁴ Yehova akuwonjezereni madalitso;
    inuyo pamodzi ndi ana anu.
¹⁵ Mudalitsidwe ndi Yehova,
    Wolenga kumwamba ndi dziko lapansi.

¹⁶ Kumwamba ndi kwa Yehova,
    koma dziko lapansi Iye walipereka kwa anthu.
¹⁷ Si anthu akufa amene amatamanda Yehova,
    amene amatsikira kuli chete;
¹⁸ ndi ife amene timatamanda Yehova,
    kuyambira tsopano mpaka muyaya.

Tamandani Yehova.