Salmo 37:12-29

Ang Pulong Sa Dios

¹² Ang mga daotan nagaplano ug daotan batok sa mga matarong,
ug gikaligutgotan nila sila.
¹³ Apan nagkatawa lang ang Ginoo sa mga daotan,
kay nahibalo siya nga hapit na ang panahon nga laglagon sila.
¹⁴ Gihulbot sa mga daotan ang ilang mga espada ug gibinat nila ang ilang mga pana
aron patyon ang mga kabos nga nagakinabuhi nga matarong.
¹⁵ Apan sila mismo ang matuhog sa ilang mga espada,
ug ang ilang mga pana mangabali.

¹⁶ Ang diotay nga iya sa matarong mas maayo pa kaysa daghan nga bahandi sa mga daotan.
¹⁷ Kuhaon sa Ginoo ang kusog sa mga daotan,
apan tabangan niya ang mga matarong.
¹⁸ Ginaatiman sa Ginoo ang mga tawo kansang kinabuhi walay ikasaway.
Ug ang ilang panulondon magpabilin nga ila hangtod sa kahangtoran.
¹⁹ Sa panahon sa kalamidad dili sila maunsa,
bisan sa panahon sa tinggutom daghan sila ug pagkaon.
²⁰ Apan ang mga daotan mangalaglag.
Ang mga kaaway sa Ginoo mahisama sa mga bulak nga mangamatay lang.
Mangawala sila nga daw aso.

²¹ Ang mga daotan manghulam ug dili mobayad.
Apan ang mga matarong mahinatagon.
²² Ang mga gipanalanginan sa Ginoo padayon nga magpuyo sa yuta sa Israel.
Apan ang iyang gipanghimaraot abugon gikan nianang yutaa.
²³ Giniyahan sa Ginoo ang matag lakang sa tawo nga nagakinabuhi nga matinumanon kaniya.
²⁴ Bisan mapandol siya, dili siya matumba tungod kay ginakuptan siya sa Ginoo.

²⁵ Sukad sa akong pagkabata hangtod karon nga tigulang na ako,
wala pa ako makakita nga ang mga matarong gipasagdan sa Ginoo
o ang ilang mga anak nagpakilimos ug pagkaon.
²⁶ Kanunay pa gani hinuon silang nagahatag ug nagapahulam,
ug ang ilang mga anak nangahimong panalangin ngadto sa uban.

²⁷ Likayi ang kadaotan ug buhata ang maayo,
aron makapuyo kamo sa yuta sa Israel hangtod sa kahangtoran.
²⁸ Kay nahigugma ang Ginoo sa katarong ug dili niya pasagdan ang nagmatinumanon kaniya.
Tipigan niya sila sa walay kataposan,
apan ang mga kaliwat sa mga daotan mahanaw gikan sa yuta sa Israel.
²⁹ Ang mga matarong makapanag-iya sa yuta ug magpuyo sila didto hangtod sa kahangtoran.