Salmo 119:65-80

Ang Pulong Sa Dios

⁶⁵ Ginoo, maayo ka kanako nga imong alagad, sumala sa imong gisaad.
⁶⁶ Hatagi akog kaalam ug kahibalo,
kay nagasalig ako sa imong mga sugo.
⁶⁷ Sa wala mo pa ako disiplinaha, mibiya ako kanimo,
apan karon ginatuman ko na ang imong pulong.
⁶⁸ Maayo ka ug nagahimo ka ug maayo.
Tudloi ako sa imong mga tulumanon.
⁶⁹ Bisan gibutang-butangan ako sa mga tawong mapahitas-on,
gituman ko gihapon ang imong mga tulumanon sa tibuok kong kasingkasing.
⁷⁰ Kining mga tawhana dili makasabot sa imong kasugoan,
apan ako nagakalipay sa pagsunod niini.
⁷¹ Maayo nga gidisiplina mo ako,
aron makakat-on ako sa imong mga tulumanon.
⁷² Alang kanako, ang kasugoan nga imong gihatag mas bililhon pa kaysa liboan ka bulawan ug pilak.

⁷³ Gibuhat mo ako ug giumol;
hatagi ako ug panabot aron makakat-on ako sa imong mga sugo.
⁷⁴ Malipay ang mga nagatahod kanimo kon ila akong makita,
kay nagasalig ako sa imong pulong.
⁷⁵ Nasayod ako, Ginoo, nga matarong ang imong mga sugo.
Ug tungod kay nagahukom ka nga makatarunganon, gidisiplina mo ako.
⁷⁶ Hinaut pa nga lipayon mo ako sa imong gugma sumala sa imong saad kanako nga imong alagad.
⁷⁷ Kaloy-i ako aron padayon akong magkinabuhi,
kay nagakalipay ako sa pagsunod sa imong balaod.
⁷⁸ Hinaut pa nga maulawan ang mga tawong mapahitas-on tungod kay gidaot nila ako pinaagi sa pagbutang-butang kanako.
Apan ako, mamalandong sa imong mga tulumanon.
⁷⁹ Hinaut pa nga moduol kanako ang mga nagatahod kanimo ug nakahibalo sa imong mga katudloanan.
⁸⁰ Hinaut pa nga matuman ko sa tibuok kong kasingkasing ang imong mga tulumanon aron dili ako maulawan.