Salmo 119:49-64

Ang Pulong Sa Dios

⁴⁹ Hinumdomi ang imong saad kanako nga imong alagad,
kay kini ang nagahatag kanako ug paglaom.
⁵⁰ Ang nagalipay kanako sa akong mga pag-antos mao kini: ang imong saad nagalugway sa akong kinabuhi.
⁵¹ Gibiaybiay ako pag-ayo sa mga mapahitas-on,
apan wala ako mobiya sa imong kasugoan.
⁵² Ginoo, gihinumdoman ko ang imong mga sugo nga gihatag mo sa unang panahon,
ug naghatag kini kanako ug kalipay.
⁵³ Labihan ang akong kasuko tungod sa mga tawong daotan nga nagasalikway sa imong kasugoan.
⁵⁴ Magaawit ako mahitungod sa imong mga tulumanon bisan asa ako magpuyo.^[a]
55 Ginoo, panahon sa kagabhion ginahinumdoman ko ikaw ug ginahunahuna ko kon unsaon ko pagtuman ang imong kasugoan.
⁵⁶ Mao kini ang akong kalipay: ang pagsunod sa imong mga tulumanon.

⁵⁷ Ikaw lang gayod Ginoo ang akong gikinahanglan.
Nagasaad ako sa pagtuman sa imong mga pulong.
⁵⁸ Gihangyo ko ikaw sa kinasingkasing gayod;
kaloy-i ako sumala sa imong saad.
⁵⁹ Gihinuktokan ko ang akong pagkinabuhi,
ug misaad ako nga mosunod sa imong mga katudloanan.
⁶⁰ Gituman ko dayon ang imong mga sugo.
⁶¹ Bisan pa ug gigapos ako sa mga tawong daotan,
wala ko kalimti ang imong mga kasugoan.
⁶² Sa panahon sa tungang gabii mobangon ako sa pagpasalamat kanimo sa matarong mo nga mga sugo.
⁶³ Higala ako sa tanan nga nagatahod kanimo ug nagatuman sa imong mga tulumanon.
⁶⁴ Ginoo, gihigugma mo ang tanang mga tawo sa kalibotan.
Tudloi ako sa imong mga tulumanon.