Salmo 105:16-36

Ang Pulong Sa Dios

¹⁶ Sa dihang nagpadala ang Dios ug kagutom sa yuta sa Canaan,
gihurot niyag kuha ang tanan nilang kuhaanan ug pagkaon.
¹⁷ Apan gipauna na niyang daan si Jose, nga gibaligya ingon nga ulipon didto sa Ehipto.
¹⁸ Gikadenahan ang iyang mga tiil
ug gibutangan ug puthaw ang iyang liog,
¹⁹ hangtod nga natuman ang iyang gitagna.
Ang mensahe sa Ginoo kaniya nga natuman nagpamatuod nga matarong siya.
²⁰ Gibuhian siya sa hari sa Ehipto nga nangulo sa daghang katawhan,
²¹ ug gihimo siya nga tigdumala sa palasyo ug sa tanang kabtangan niini.
²² Isip tigdumala, may katungod siya sa pagbadlong sa mga opisyal sa hari,
ug sa pagtudlo sa mga magtatambag niini.

²³ Unya miadto si Jacob ug ang iyang panimalay sa Ehipto, ang yuta sa mga kaliwat ni Ham,
ug didto sila namuyo.
²⁴ Gipadaghan sa Ginoo ang iyang katawhan;
mas daghan pa kay sa mga taga-Ehipto nga ilang mga kaaway.
²⁵ Gitugot sa Ginoo nga kasilagan ug limbongan sa mga taga-Ehipto ang iyang katawhan nga iyang mga alagad.
²⁶ Unya gipadala niya si Moises nga iyang alagad ug si Aaron nga iyang pinili.
²⁷ Gipakita nila didto sa yuta sa mga kaliwat ni Ham ang katingalahang mga buhat sa Dios.
²⁸ Gipangitngit sa Dios ang Ehipto;
apan misupak gihapon^[a] ang mga taga-Ehipto sa iyang mga sugo.
²⁹ Gihimo niyang dugo ang ilang mga tubig,
busa nangamatay ang mga isda.
³⁰ Napuno ug baki ang ilang yuta,
bisan ang mga kuwarto sa ilang mga pangulo.
³¹ Sa pagmando sa Dios, napuno ug langaw ug lamok^[b] ang ilang yuta.
³² Gipadad-an niya sila ug ulan nga ice ug kilat.
³³ Gipangdaot niya ang ilang mga tanom nga ubas ug ang mga kahoy nga igos, ug ang uban pang mga kahoy.
³⁴ Sa iyang pagmando, miabot ang mga dulon^[c] nga dili maihap sa kadaghan.
³⁵ Ug gikaon niini ang tanang mga tanom sa ilang yuta apil na ang ilang mga anihon.
³⁶ Gipamatay sa Dios ang tanan nilang mga kamagulangang anak nga lalaki.