⁴ Teweemalangako mirembe ng’oyaayaanira obugagga;
    weefuge obeere mukkakkamu.
^5 (B)Eby’obugagga obikubako eriiso limu nga by’agenze dda,
    kubanga ddala bimera ebiwaawaatiro
    ne bibuuka mu bbanga ng’empungu.

^6 (C)Tolyanga mmere ya muntu mukodo,
    wadde okwegomba ebirungi by’alya.
⁷ Kubanga ye muntu
    abalirira ensimbi z’asaasaanyizza,
    n’akugamba nti, “Weeriire, weenywere,”
    naye ng’omutima gwe tegukusanyukira.
⁸ Akatono k’onooba olidde onookasesema,
    ebigambo byo ebirungi eby’okwebaza bibe bya bwereere.

^9 (D)Totegana kubuulirira musirusiru,
    kubanga ajja kunyooma ebigambo byo eby’amagezi.

^10 (E)Tojjululanga nsalo ey’edda,
    so toyingiriranga nnimiro za bamulekwa,
^11 (F)kubanga abalwanirira w’amaanyi,
    alikuggulako omusango.

¹² Ossangayo omwoyo eri okuyigirizibwa,
    n’amatu go eri ebigambo by’okutegeera.

¹³ Tolekangayo kukangavvula mwana,
    bw’omubonereza n’akaggo tekimutta.
¹⁴ Mubonerezenga n’akaggo,
    kiwonye emmeeme ye okufa.

¹⁵ Mwana wange, bw’oba n’omutima ogw’amagezi,
    kinsanyusa.
^16 (G)Nnaajjaguzanga okuva ku ntobo y’omutima gwange,
    bw’onooyogeranga ebituufu.

^17 (H)Omutima gwo gulemenga okukwatirwa aboonoonyi obuggya,
    kyokka nyiikira okutya Mukama ebbanga lyonna.
^18 (I)Mazima ddala onoobanga n’essuubi mu biseera eby’omu maaso,
    n’essuubi lyo eryo teririggwaawo.

¹⁹ Mwana wange wulirizanga, obeerenga n’amagezi,
    okumenga omutima gwo mu kkubo ettuufu.
^20 (J)Teweegattanga ku abo abeekamirira omwenge,
    n’abalulunkanira ennyama:
^21 (K)Kubanga omutamiivu n’omuluvu baavuwala,
    n’okubongoota olutata kubambaza enziina.

^22 (L)Wulirizanga kitaawo eyakuzaala,
    so togayanga nnyoko ng’akaddiye.
^23 (M)Gula amazima so togatunda,
    ffuna amagezi, n’okuyigirizibwa n’okutegeera.
^24 (N)Kitaawe w’omutuukirivu alina essanyu lingi,
    n’oyo azaala omwana ow’amagezi amwenyumiririzaamu.
²⁵ Leka kitaawo ne nnyoko basanyuke,
    omukazi eyakuzaala ajaguzenga.

^26 (O)Mwana wange mpa omutima gwo,
    n’amaaso go geekalirize amakubo gange,
^27 (P)kubanga omukazi omwenzi lukonko luwanvu,
    n’omukazi omubambaavu luzzi lufunda.
^28 (Q)Ateega ng’omutemu,
    n’ayongera ku muwendo gw’abasajja abatali beesigwa eri bakazi baabwe.

²⁹ Ani alina obuyinike? Ani alina ennaku?
    Ani alina ennyombo? Ani alina okwemulugunya?
    Ani alina ebiwundu eby’obwereere? Ani amyuse amaaso?
^30 (R)Abo abatava ku mwenge,
    nga bagenda baloza ku mwenge omutabule.
³¹ Totunuulira wayini ng’amyuse,
    bw’atemaganira mu ggiraasi
    ng’akka empolampola;
³² ku nkomerero aluma ng’omusota,
    wa busagwa ng’essalambwa.
³³ Amaaso go galiraba ebyewuunyo,
    n’omutwe gwo ne gulowooza ebitategeerekeka.
³⁴ Oliba ng’omuntu eyeebase wakati mu nnyanja,
    obanga oyo alengejjera waggulu ku mulongooti.
³⁵ Olyogera nti, “Bankubye, naye sirumiddwa.
    Bankubye naye sirina kye mpuliddemu.
Nnaazuukuka ddi,
    neeyongere okunywa?”