Philippenses 2:1-11

Biblia Sacra Vulgata

2 Si qua ergo consolatio in Christo, si quod solatium caritatis, si qua societas spiritus, si qua viscera miserationis:

² implete gaudium meum ut idem sapiatis, eamdem caritatem habentes, unanimes, idipsum sentientes,

³ nihil per contentionem, neque per inanem gloriam: sed in humilitate superiores sibi invicem arbitrantes,

⁴ non quae sua sunt singuli considerantes, sed ea quae aliorum.

⁵ Hoc enim sentite in vobis, quod et in Christo Jesu:

⁶ qui cum in forma Dei esset, non rapinam arbitratus est esse se aequalem Deo:

⁷ sed semetipsum exinanivit, formam servi accipiens, in similitudinem hominum factus, et habitu inventus ut homo.

⁸ Humiliavit semetipsum factus obediens usque ad mortem, mortem autem crucis.

⁹ Propter quod et Deus exaltavit illum, et donavit illi nomen, quod est super omne nomen:

¹⁰ ut in nomine Jesu omne genu flectatur caelestium, terrestrium et infernorum,

¹¹ et omnis lingua confiteatur, quia Dominus Jesus Christus in gloria est Dei Patris.