Nnwom 135

Nkwa Asem

Ayeyi dwom

135 Kamfo Awurade! Monkamfo ne din, Awurade asomfo ² a, mugyina Awurade fi a ɛyɛ Onyankopɔn fi hɔ no. ³ Monkamfo Awurade efisɛ, oye. Monto ayeyi nnwom wɔ ne din mu efisɛ, ne yam ye. ⁴ Oyii Yakob maa ne ho na oyii Israelfo sɛ n’ankasa ne de.

⁵ Minim sɛ yɛn Awurade yɛ ɔkɛse; Ɔyɛ ɔkɛse sen anyame no nyinaa. ⁶ Ɔyɛ nea ɔpɛ biara wɔ soro ne asase so, ɛpo mu ne ɛpo ase pɛɛ. ⁷ Ɔma ahum mu mununkum fi asase ano ba; ɔma anyinam twa fi ahum no mu na watwe mframa afi ne hintabea. ⁸ Okum nnipa ne mmoa nyinaa mmakan wɔ Misraim. ⁹ Ɛhɔ na ɔyɛɛ anwonwade de twee ɔhene ne ne mpanyimfo aso. ¹⁰ Ɔsɛee aman pii, kunkum ahene atumfo. ¹¹ Okum Amorihene, Sihon. Okum Basanhene, Og ne ahene a wɔwɔ Kanaan nyinaa. ¹² Ɔde wɔn nsase maa ne nkurɔfo. Ɔde maa Israel.

¹³ Awurade, daa wɔbɔ wo din sɛ woyɛ Onyankopɔn. Nkyirimma nyinaa bɛkae wo. ¹⁴ Awurade bɛbɔ ne nkurɔfo ho ban. Obehu n’asomfo mmɔbɔ.

¹⁵ Wɔde dwetɛ ne sikakɔkɔɔ na ɛyɛɛ aman no mu anyame no; wɔde nnipa nsa nso na ɛyɛe. ¹⁶ Wɔwɔ ano, nanso wɔnkasa; wɔwɔ ani, nanso wonhu ade, ¹⁷ wɔwɔ aso, nanso wɔnte asɛm na wontumi nhome nso. ¹⁸ Wɔn a wɔyɛɛ wɔn na wogye wɔn di no nyinaa nyɛ te sɛ ahoni no ara pɛ.

¹⁹ Monkamfo Awurade, nnipa a mowɔ Israel; monkamfo no, mo Nyankopɔn asɔfo! ²⁰ Monkamfo no, mo Lewifo; monkamfo no, mo a mosom no nyinaa! ²¹ Monkamfo Awurade wɔ Sion, wɔ Yerusalem, ne fi.

Kamfo Awurade!