Nnwom 101

Nkwa Asem

Ɔhene bɔhyɛ

101 Me dwom yi fa nokware ne trenee ho, na meto ma wo, Awurade.

² Me suban bɛyɛ pɛ. Da bɛn na wobɛba me nkyɛn? Mɛtena ase kronn wɔ me fi, ³ na meremma bɔne kwan. Mekyi wɔn a wɔtwe wɔn ho fi Onyankopɔn ho no. Me ne wɔn nni biribiara yɛ. ⁴ Merenni atoro na me ne bɔne nnya biribiara nyɛ. ⁵ Mɛtwe me ho afi obi a odi ne yɔnko ho nseku no ho. Na me ne onipa a ɔyɛ ahantan ne atutupɛ remmɔ. ⁶ Megye wɔn a wodi Onyankopɔn nokware atom na me ne wɔn atena m’ahemfi. Wɔn a wodi nokware pa ara no na mɛma wɔasom me. ⁷ Ɔtorofo biara rentena m’ahemfi. Na nyaatwomni biara nso remma m’anim. ⁸ Adekyee biara, mɛsɛe amumɔyɛfo a wɔwɔ asase yi so, na mapam nnebɔneyɛfo afi Awurade kurow mu.