² Amene amayenda molungama amaopa Yehova,
    koma amene njira zake ndi zoyipa amanyoza Yehova.

³ Kuyankhula kwa chitsiru kumamuyitanira ndodo pa msana,
    koma milomo ya munthu wanzeru imamuteteza.

⁴ Pakasowa ngʼombe zolima gome limakhala lopanda chakudya,
    koma pakakhala ngʼombe zamphamvu zakudya zimachulukanso.

⁵ Mboni yokhulupirika sinama,
    koma mboni yonyenga imayankhula zabodza.

⁶ Wonyoza anzake amafunafuna nzeru koma osayipeza,
    koma munthu womvetsa bwino amadziwa zinthu msanga.

⁷ Khala kutali ndi munthu wopusa
    chifukwa sudzapeza mawu a nzeru.

⁸ Nzeru za munthu wochenjera zagona pakuzindikira njira zake.
    Koma uchitsiru wa zitsiru umapusitsidwa ndi chinyengo chawo chomwe.

⁹ Zitsiru zimanyoza za kulapa machimo, awo,
    koma kufuna kwabwino kumapezeka mwa anthu olungama.

¹⁰ Mtima uliwonse umadziwa wokha zowawa zake,
    ndipo palibe wina aliyense angadziwe kukondwa kwake.

¹¹ Nyumba ya munthu woyipa idzapasuka,
    koma tenti ya munthu wowongoka mtima idzakhazikika.

¹² Pali njira ina yooneka ngati yabwino kwa munthu,
    koma kumatsiriziro kwake ndi ku imfa.

¹³ Ngakhale poseka mtima utha kumva kuwawa,
    ndipo mathero achimwemwe akhoza kukhala chisoni.

¹⁴ Munthu wosakhulupirika adzalandira zogwirizana ndi ntchito yake,
    koma munthu wabwino adzalandira mphotho ya ntchito yake.

¹⁵ Munthu wopusa amakhulupirira chilichonse,
    koma munthu wochenjera amaganizira bwino mayendedwe ake.

¹⁶ Munthu wanzeru amaopa Mulungu ndipo amapewa zoyipa,
    koma munthu wopusa ndi wokula mtima amakhala wosasamala.

¹⁷ Munthu wopsa mtima msanga amachita zinthu za uchitsiru,
    ndipo anthu amadana ndi munthu wachinyengo.

¹⁸ Anthu opusa amalandira uchitsiru,
    koma anthu ochenjera amavekedwa chipewa cha ulemerero wa kudziwa zinthu.

¹⁹ Anthu oyipa adzagwada pamaso pa anthu abwino,
    ndipo anthu oyipa adzapempha thandizo kwa anthu olungama.

²⁰ Munthu wosauka ngakhale anansi ake omwe amamuda,
    koma munthu wolemera ali ndi abwenzi ambiri.

²¹ Wonyoza mnansi wake ndi wochimwa
    koma ndi wodala amene amachitira chifundo anthu osowa.

²² Kodi amene amakonzekera zoyipa sasochera?
    Koma amene amakonzekera zabwino anthu amawaonetsa chikondi ndi kukhulupirika.

²³ Ntchito iliyonse imakhala ndi phindu,
    koma kuyankhulayankhula kumabweretsa umphawi.

²⁴ Chipewa chaulemu cha anthu a nzeru ndi chuma chawo chomwe,
    koma malipiro a zitsiru ndi uchitsiru.

²⁵ Mboni yokhulupirika imapulumutsa miyoyo,
    koma mboni yabodza imaphetsa.

²⁶ Amene amaopa Yehova ali ndi chitetezo chokwanira
    ndipo iye adzakhala pothawira pa ana ake.

²⁷ Kuopa Yehova ndiye kasupe wamoyo,
    kumathandiza munthu kuti apewe msampha wa imfa.

²⁸ Gulu lalikulu la anthu ndiye ulemerero wa mfumu,
    koma popanda anthu kalonga amawonongeka.

²⁹ Munthu wosapsa mtima msanga amamvetsa zinthu kwambiri,
    koma munthu wopsa mtima msanga amaonetsa uchitsiru wake.

³⁰ Mtima wodekha umapatsa thupi moyo,
    koma nsanje imawoletsa mafupa.

³¹ Amene amapondereza mʼmphawi amanyoza mlengi wake,
    koma wochitira chifundo munthu wosowa amalemekeza Mulungu.

³² Anthu oyipa adzakanthidwa chifukwa cha ntchito zawo zomwe,
    koma olungama adzatetezedwa mwa imfa yawo.

³³ Nzeru zimakhala mu mtima mwa anthu omvetsa zinthu,
    koma nzeru sipezeka mu mtima mwa zitsiru.

³⁴ Chilungamo chimakweza mtundu wa anthu,
    koma uchimo umachititsa manyazi mtundu uliwonse.

³⁵ Mfumu imasangalatsidwa ndi wantchito wanzeru,
    koma imachitira ukali wantchito wochititsa manyazi.