Mga Awit 150

Ang Biblia, 2001

150 Purihin ang Panginoon!
Purihin ang Diyos sa kanyang santuwaryo;
    purihin siya sa kanyang makapangyarihang kalawakan!
² Purihin siya dahil sa kanyang mga makapangyarihang gawa;
    purihin siya ayon sa kanyang kadakilaang pambihira!

³ Purihin siya sa tunog ng trumpeta;
    purihin siya sa salterio at alpa!
⁴ Purihin siya sa mga tamburin at sayaw;
    purihin siya sa mga panugtog na may kuwerdas!
⁵ Purihin siya ng mga matunog na pompiyang!
    Purihin siya sa mga pompiyang na maiingay!
⁶ Lahat ng bagay na may hininga ay magpuri sa Panginoon!
Purihin ang Panginoon!