108 O Dios, lubusan akong nagtitiwala sa inyo.
    Buong puso kitang aawitan ng mga papuri.
² Gigising ako ng maaga
    at ihahanda ko ang alpa at mga instrumentong may mga kwerdas.
³ Panginoon, pupurihin kita sa gitna ng mga bansa.
    Akoʼy aawit para sa inyo sa gitna ng inyong mga mamamayan.
⁴ Dahil napakadakila at walang kapantay ang pag-ibig nʼyo at katapatan.
⁵ O Dios, ipakita nʼyo ang inyong kapangyarihan sa kalangitan at sa buong mundo.
⁶ Iligtas nʼyo kami sa pamamagitan ng inyong kapangyarihan.
    Pakinggan nʼyo kami,
    upang kaming mga iniibig nʼyo ay maligtas.
⁷ O Dios, sinabi nʼyo roon sa inyong templo,
    “Magtatagumpay ako! Hahatiin ko ang Shekem at ang Lambak ng Sucot,
    para ipamigay sa aking mga mamamayan.
⁸ Sa akin ang Gilead at Manase,
    ang Efraim ay gagawin kong tanggulan^[a]
    at ang Juda ang aking tagapamahala.^[b]
9 Ang Moab ang aking utusan^[c] at ang Edom ay sa akin din.^[d]
    Sisigaw ako ng tagumpay laban sa mga Filisteo.”