Matthaeus 8:23-27

Biblia Sacra Vulgata

²³ Et ascendente eo in naviculam, secuti sunt eum discipuli ejus:

²⁴ et ecce motus magnus factus est in mari, ita ut navicula operiretur fluctibus: ipse vero dormiebat.

²⁵ Et accesserunt ad eum discipuli ejus, et suscitaverunt eum, dicentes: Domine, salva nos: perimus.

²⁶ Et dicit eis Jesus: Quid timidi estis, modicae fidei? Tunc surgens imperavit ventis, et mari, et facta est tranquillitas magna.

²⁷ Porro homines mirati sunt, dicentes: Qualis est hic, quia venti et mare obediunt ei?