Lucas 20

Mushuj Testamento Diospaj Shimi

Pi cachajpi shamushcatami Jesusta tapushcacuna

20 Jesús shuj punlla Diospaj huasipi, alli huillaita huillashpa yachachicujpimi, curacunata mandajcunapish, Mandashcata yachachijcunapish, cunaj yuyajcunapish chayarcacuna. ² Paicunaca:

–¿Pitaj caicunataca rurachicun? ¿Pitaj Cantaca cashna rurachun cacharca?– nishpa tapurcacuna

³ Shina nijpi Jesusca, cashnami nirca:

–Ñucapish cancunata shuj shimillata tapusha. Chaitaca cutichinami canguichij. ⁴ Bautiźaj Juan bautiźachunca, ¿Dioschu, mana cashpaca runacunallachu cachashca canga?– nircami.

⁵ Chashna nijpi, paicunapura parlanacushpaca cashnami nircacuna:

–¿Ima nishuntaj? “Juantaca Diosmi cachashca” nijpica, shinashpaca: “¿Ima nishpataj pai huillashcataca mana crircanguichij?” ningami. ⁶ “Runacunallami cachashca” nijpipish, tucuicunami Juantaca, Dios cachashca huillaj cashcata crincuna. Chashna nijpica, ñucanchijtaca rumicunahuan shitashpamari huañuchingacuna– ninacurcacunami.

⁷ Chashna ninacushpaca:

–Imatajshiari, pi cachashca cashcata mana yachanchijchu– nircacunami.

⁸ Chashna nijpimi, Jesusca:

–Shinashpaca, Ñucapish pi mandajpi cashna rurashcataca mana huillashachu– nircami.

Chacarerocunahuan ch'imbapurashpa yuyachishca parlomi

⁹ Chashna nishca q'uipami, Jesusca tucui chaipi cajcunamanca yuyachij cai parlota, cashna nishpa parlarca:

–Shuj runaca, uvas chagrata tarpushpami, shuj chacarerocunaman mingashpa unaicama rirca. ¹⁰ Uvasta pallana punllacuna ña chayamujpica, chai chagrayujca pai japina cashcata chaupimuchunmi paipaj servijcunataca, chagrajcunapajman cacharca. Ashtahuanpish chagracuj runacunaca chagrayuj cachashca runacuna chayamujpica, macashpa, chushaj maquitami tigrachishpa cacharcacuna. ¹¹ Chai huashaca chagrayujca, cutinmi shujtaj servijta cacharca. Chai runatapish macashpa, pinganayajta rimashpami, chushaj maquillatataj tigrachishpa cacharcacuna. ¹² Chashna rurajpipish, cutinllatajmi shujtaj servijta cacharca. Ashtahuanpish chagrajcunaca, chai runatapish chugrichishpami, allpamanta llujshichishpa cacharcacuna.

¹³ Tucui chaicunata cachashca q'uipaca, chagrayujca: “¿Imatataj rurashachu, imamí? Ñuca c'uyashca churitatajca manchangacunapishchari” nishpami, paita cacharca. ¹⁴ Paita ricushpacarin chai runacunaca, caishuj chaishujmi: “Riquichij, churitamari cachashca. Paimari cai allpataca japinga. Ñucanchij chaihuan saquiringapaj, paitaca huañuchishunchij” ninacurcacunami. ¹⁵ Chashna ninacushpaca, uvas chagramanta llujshichishpami huañuchircacuna. Allpayuj shamushpaca, chai huañuchijcunataca, ¿imatashi ruranga? ¹⁶ Pai shamushpaca, chai runacunataca huañuchishpa, allpatapish shujtajcunamanmari cunga– nircami.

Jesús chashna nijta uyashpaca, mancharishpami:

–¡Ñucanchij chashna tucuchunca, Dios ama munachun!– nircacuna.

¹⁷ Chashna nijpipish Jesusca, paicunapaj ñahuitataj ricushpami, cashna nirca:

–Dios Quillcachishcapica, ¿ima nishpataj cashna nishcata yuyanguichij?

¹⁸ Maijanpish chai Rumipi urmashpaca, p'aquiringami. Chai Rumi maijanpaj jahuapi urmashpacarin, ñutungami– nircami.

‘Impuestotaca cunallami’ nishcami

¹⁹ Pushaj curacunapish, Mandashcata yachachijcunapish paicunaman uyachishpalla chai yuyachij parlota Jesús parlashcata yachashpami p'iñarishpa, chai punllallataj japishpa huañuchinata yuyarcacuna. Chashna yuyashpapish shujtajcunata manchashcamantaca, imata mana rurarcacunachu. ²⁰ Chaimantami imapipish pandachina yuyaihuan paicunaca, imatapish alli shunguhuan tapuj shina tapuchun, shuj runacunata cacharcacuna. Imapi pandarijpica chaita juchachishpa, llajtata mandajpaj maquipi churangapajmi chashna catirarcacuna. ²¹ Chai runacunaca, cashnami tapurcacuna:

–Yachachij, canca imata nishpapish, yachachishpapish mana pandaringuichu. Mana pipaj ñahuita ricushpalla yachachinguichu. Ashtahuanpish Taita Dios munashca shina, alli causachunmi alli yachachingui. ²² Mandashcapica, ¿Cesarman impuestota cuchunlla, ninchu?– nishpami tapurca.

²³ Ashtahuanpish mana alli yuyaihuan tapushcata yachashpami, Jesusca cashna nirca:

–¿Ñucataca ima nishpataj pandachisha ninguichij? ²⁴ Cullquita ricuchichij. ¿Pipaj ñahuitaj, pipaj shutitaj tiyacun?– nijpica:

–Cesarpaj ñahuimi– nircacuna.

²⁵ Chashna nijpi:

–Shinashpaca Cesarpaj cashcataca, Cesarman cuichij. Diospaj cashcataca, Diosman cuichigari– nircami.

²⁶ Chashna tucuicunapaj ñaupajpi imata tapushpapish, imata mana juchachi tucurcacunachu. Imatapish tapushcata alli huillajpica, achcata mancharishpami upalla carcacuna.

Saduceocunami causarinamanta Jesusta tapushca

²⁷ Huañushcacuna causarinata mana crij, maijan saduceocuna Jesuspajman chayamushpaca, cashnami tapurcacuna:

²⁸ –Yachachij, Moisés ñucanchijman quillcashcapica: “Caźarashca shuj runa manaraj huahuayuj tucushpa huañungachari. Saquirishca huarmihuanca, paipaj huauquillataj caźarashpa, huauquipaj randi pai huahuacunayuj tucuchun” nishcami. ²⁹ Ñucanchij llajtapica, canchis huauquindijmi tiyarca. Chai canchis huauquindijcunamanta punta huauqui caźarashpaca, manaraj huahuayuj tucushpami huañurca. ³⁰ Chashna huañujpica, q'uipa huauquimi chai huarmihuan caźararca. Paipish manaraj huahuayuj tucushpami huañurca. ³¹ Chaipish huañujpica, ashtahuan q'uipa huauquimi, chai huarmillahuantaj caźararca. Paipish manaraj huahuayuj tucushpallatajmi huañurca. Chashnami canchis huauquindijtaj chai huarmihuan caźarashpaca, mana huahuayuj tucushpa huañurcacuna. ³² Tucuicunapaj catica, chai huarmipish huañurcami. ³³ Chashna canchis huauquindijpaj huarmi cashcamantaca, huañushcacuna causarimui punllapica, ¿maijanpaj huarmishi canga?– nircacunami.

³⁴ Chashna nijpimi, Jesusca cashna nirca:

–Cunan cai causaillapimi c'aripish, huarmipish caźarancuna. ³⁵ Ashtahuanpish huañushcacuna causari punllapica, jahua pachaman rina cajcuna causarishpaca, mana caźarangacunachu, mana caźarachingachu. ³⁶ Picunaca, Diospaj huahuacuna cashcamanta, causarishpaca mana cutin huañungacunachu. Angelcuna shinamari canga. ³⁷ Illu huañushcacuna causarinamantaca, Moisespish yachachishcatajmari. Casha yura rupacunmanta Taita Dios rimashcata parlashpaca, Mandaj Diostaca: ‘Abrahampaj, Isaacpaj, Jacobopaj Dios’ ninmari. ³⁸ Pai nishca shinaca, Taita Diosca mana huañushcacunapaj Dioschu, causacujcunapaj Diosmari. Paipaj ñaupajpica, tucuicuna causajcunamari– nircami.

³⁹ Chashna nijpi Mandashcata yachachij maijancunaca, Jesustaca:

–Yachachij, allitamari ningui– nircacuna.

⁴⁰ Chaimantaca, ña mana imata ashtahuan tapui tucurcacunachu.

¿Cristotaca pipaj Churi cashcatataj yuyanguichij?

⁴¹ Jesusllatajmi paicunataca, cashna tapurca:

–¿Ima nishpataj Cristotaca, ‘Davidpaj Churimi’ nincuna? ⁴² Davidllatajmari, Salmos Libropica:

⁴⁴ Davidllataj Cristotaca: ‘Ñucata Mandaj’ nijpica, ¿ima shinataj Cristoca Davidpaj Churi cangari?– nircami.

Mandashcata yachachijcunatami Jesusca sinchita juchachishca

⁴⁵ Tucui chaipi cajcuna uyacujpimi, Jesusca Paipaj yachacujcunata cashna nirca:

⁴⁶ –Pajta cancunapish Mandashcata yachachijcuna shina rurasha ninguichijman. Paicunaca, pambata p'ichacuj churanata churarishcami purinata munancuna. Plazacunapi pi tupajpipish, paicunata manchaihuan alabaduchunmi munancuna. Maipi ima jatun micuicunapipish, tandanacuna huasicunapipish punta alli tiyarinapi tiyarinamantaca huañucuncunami. ⁴⁷ Viuda huarmicunapaj huasicunata quichushpa millpujcunami. Chashna rurashpaca, alli ricurij tucungapajmi unaita Diostaca mañaj tucuncuna. Chashna rurajcuna cashcamantaca, paicunatami shujtajcunata yalli jatunta llaquichinga– nircami.