Levitico 18:7-20

Magandang Balita Biblia

⁷ Huwag kayong makipagtalik sa inyong ina, iyan ay kahihiyan sa inyong ama. Hindi ninyo dapat halayin ang inyong ina. ⁸ Huwag^(A) kayong makipagtalik sa ibang asawa ng inyong ama, inilalagay ninyo sa kahihiyan ang inyong sariling ama. ⁹ Huwag^(B) kayong makipagtalik sa inyong kapatid na babae, maging siya'y anak ng inyong ama o ng inyong ina, ipinanganak man siya sa inyong lupain o sa ibang bayan. ¹⁰ Huwag kayong makipagtalik sa inyong apo, maging sa anak ninyong lalaki o babae; iyan ay kahihiyan sa inyo. ¹¹ Huwag kayong makipagtalik sa anak ng inyong ama sa ibang babae, sapagkat siya'y kapatid din ninyo. ¹² Huwag^(C) kayong makipagtalik sa kapatid na babae ng inyong ama, siya'y kadugo ng inyong ama. ¹³ Huwag kayong makipagtalik sa kapatid na babae ng inyong ina, siya'y kadugo ng inyong ina. ¹⁴ Huwag kayong makipagtalik sa asawa ng inyong tiyo, tiya mo na rin siya. ¹⁵ Huwag^(D) kayong makipagtalik sa inyong manugang na babae; siya'y asawa ng inyong anak na lalaki. Hindi ninyo dapat ilagay sa kahihiyan ang inyong sariling anak. ¹⁶ Huwag^(E) kayong makipagtalik sa inyong hipag; taglay niya ang kapurihan ng inyong kapatid. ¹⁷ Huwag^(F) kayong makipagtalik sa anak o sa apong babae ng isang babaing nakatalik ninyo noon. Maaaring ang mga iyon ay kamag-anak ninyo, at iyan ay kahalayan. ¹⁸ Hindi ninyo maaaring maging asawa ang inyong hipag kung buháy pa ang inyong asawa. Inilalagay ninyo sa kahihiyan ang iyong asawa na kanyang kapatid.

¹⁹ “Huwag^(G) kayong makipagtalik sa isang babae habang siya'y may regla sapagkat siya'y marumi. ²⁰ Huwag^(H) ninyong durungisan ang inyong sarili sa pakikiapid sa asawa ng iba.