Kawikaan 21:21-31

Ang Salita ng Dios (Tagalog Contemporary Bible)

²¹ Ang taong namumuhay sa katuwiran at kabutihan ay hahaba ang buhay, magtatagumpay at pararangalan.
²² Mapapasuko ng matalinong pinuno ang bayan na maraming sundalo, at kaya niyang gibain ang mga pader na kanilang inaasahang tanggulan.
²³ Ang taong nag-iingat sa kanyang mga sinasabi ay nakakaiwas sa gulo.
²⁴ Ang taong palalo at mayabang ay makikilala mo dahil nangungutya siya at sukdulan ang kayabangan.
²⁵ Kung marami kang ninanais ngunit tamad kang magtrabaho, iyon ang sisira sa iyo.
²⁶ Ang taong tamad ay laging naghahangad na makatanggap, ngunit ang taong matuwid ay nagbibigay nang walang alinlangan.
²⁷ Kinasusuklaman ng Panginoon ang handog ng taong masama, lalo na kung ihahandog niya ito ng may layuning masama.
²⁸ Patitigilin sa pagsasalita ang saksing sinungaling, ngunit ang saksing nagsasabi ng katotohanan ay pakikinggan.
²⁹ Ang taong masama ay hindi pinag-iisipan ang kanyang ginagawa, ngunit ang taong matuwid ay pinag-iisipan muna nang mabuti ang kanyang ginagawa.
³⁰ Walang karunungan, pang-unawa o payo ang makakapantay sa Panginoon.
³¹ Kahit nakahanda na ang mga kabayo para sa labanan, ang Panginoon pa rin ang nagbibigay ng katagumpayan.