Kawikaan 1-2

Ang Salita ng Dios (Tagalog Contemporary Bible)

Ang Kahalagahan ng Kawikaan

1 Ito ang mga kawikaan ni Solomon na anak ni David, hari ng Israel.

² Sa pamamagitan ng mga kawikaang ito, magkakaroon ka ng karunungan, maitutuwid mo ang iyong ugali at mauunawaan mo ang mga aral na magbibigay sa iyo ng karunungan. ³ Sa pamamagitan din nitoʼy magiging disiplinado ka, dahil itinuturo nito ang matuwid na paraan ng pamumuhay, mabuting pag-uugali, paggawa ng tama, at pagiging makatarungan. ⁴ Makapagbibigay ito ng karunungan sa mga walang kaalaman at sa kabataaʼy magtuturo ng tamang pagpapasya. ⁵ Sa pakikinig nito, ang marunong ay lalong magiging marunong at ang may pinag-aralan ay magiging dalubhasa, ⁶ upang maunawaan nila ang kahulugan ng mga kawikaan, mga talinghaga, at mga bugtong ng marurunong.

⁷ Ang pagkatakot sa Panginoon na may paggalang ang simula ng karunungan. Ngunit sa hangal,^[a] walang halaga ang karunungan at ayaw niyang maturuan upang maituwid ang kanyang pag-uugali.

Payo sa Pag-iwas sa Masamang Tao

⁸ Anak, dinggin mo ang turo at pagtutuwid sa iyong pag-uugali ng iyong mga magulang, ⁹ dahil itoʼy makapagbibigay sa iyo ng karangalan katulad ng koronang gawa sa bulaklak at makapagpapaganda katulad ng kwintas.

¹⁰ Anak, huwag kang padadala sa panghihikayat ng mga taong makasalanan. ¹¹ Huwag kang sasama kapag sinabi nilang, “Halika, sumama ka sa amin! Mag-abang tayo ng sinumang papatayin kahit walang dahilan. ¹² Kahit nasa kasibulan pa ng kanilang buhay, patayin natin sila para matulad sila sa mga taong pumunta sa lugar ng mga patay. ¹³ Makakakuha tayo sa kanila ng mga mamahaling ari-arian, at pupunuin natin ang ating mga bahay ng ating mga nasamsam. ¹⁴ Sige na, sumama ka na sa amin, at paghahatian natin ang ating mga nasamsam.”

¹⁵ Anak, huwag kang sumama sa kanila; iwasan mo sila. ¹⁶ Sapagkat mabilis sila sa paggawa ng masama at sa pagpatay ng tao. ¹⁷ Walang kabuluhan ang paglalagay ng bitag kung ang ibong iyong huhulihin ay nakatingin. ¹⁸ Alam ng ibon na mahuhuli siya, pero ang taong masasama, hindi nila alam na sila rin ang magiging biktima ng ginagawa nila.

¹⁹ Ganyan ang mangyayari sa mga taong ang ari-arian ay nakuha sa masamang paraan. Mamamatay sila sa ganoon ding paraan.

Kapag Itinakwil ang Karunungan

^20-21 Ang karunungan ay katulad ng isang mangangaral na nagsasalita sa mga lansangan, plasa, pamilihan, at mga pintuang bayan. Sinasabi niya,

Ang Kahalagahan ng Karunungan

2 Anak, tanggapin at ingatan mo sa iyong puso ang mga itinuturo at iniuutos ko sa iyo. ² Pakinggan mo kung ano ang makapagbibigay sa iyo ng karunungan at kaalaman. ³ Pagsikapan mong magkaroon ng pang-unawa, ⁴ na parang naghahanap ka ng pilak o anumang nakatagong kayamanan. ⁵ Kung gagawin mo ito, malalaman mo kung ano ang pagkatakot sa Panginoon at mauunawaan mo ang tungkol sa kanya. ⁶ Sapagkat ang Panginoon ang nagbibigay ng karunungan, kaalaman, at ng pang-unawa. ^7-8 Iniingatan niya ang namumuhay nang matuwid, matapat, at walang kapintasan. Binibigyan din niya sila ng katagumpayan.^[b]

⁹ Kung makikinig ka sa akin, malalaman mo ang dapat mong gawin, ang tama, matuwid at nararapat. ¹⁰ Sapagkat lalong lalawak ang iyong karunungan at magbibigay ito sa iyo ng kaligayahan. ¹¹ Kapag nakakaunawa ka at marunong magpasya nang tama, iingatan ka nito. ¹² Ilalayo ka ng karunungan sa masamang pag-uugali at sa mga taong nagsasalita ng masama. ¹³ Pinili ng mga taong ito na iwanan ang magandang pag-uugali at sumunod sa pamamaraan ng mga nasa kadiliman. ¹⁴ Natutuwa sila sa paggawa ng masama at nasisiyahan sa mga kalikuan nito. ¹⁵ Masama ang pag-uugali nila at hindi matuwid ang kanilang pamumuhay.

¹⁶ Ilalayo ka ng karunungan sa masamang babaeng gustong umakit sa iyo sa pamamagitan ng kanyang matatamis na salita. ¹⁷ Iniwan ng ganyang babae ang napangasawa niya noong kanyang kabataan. Kinalimutan niya ang pangako niya sa Dios nang silaʼy ikasal. ¹⁸ Kapag pumunta ka sa bahay niya, para ka na ring pumunta sa kamatayan. Sapagkat ito ang daan tungo sa daigdig ng mga patay. ¹⁹ Kung sino man ang pupunta sa kanya ay hindi na makakauwi; makakalimutan na niya ang daan patungo sa lugar ng mga buhay. ²⁰ Kaya tularan mo ang pamumuhay ng mabubuting tao at mamuhay ka ng matuwid. ²¹ Sapagkat ang taong namumuhay nang matuwid at walang kapintasan ay mabubuhay nang matagal dito sa daigdig. ²² Ngunit ang masasama at mga mandaraya ay palalayasin. Bubunutin sila na parang mga damo.