Kawikaan 7

Ang Salita ng Dios (Tagalog Contemporary Bible)

7 Anak, sundin mo ang mga sinasabi ko sa iyo. Itanim mo ito sa iyong isipan at ² sundin ang mga iniuutos ko, upang humaba ang buhay mo. Ingatan mong mabuti ang mga itinuturo ko katulad ng pag-iingat mo sa mga mata mo. ³ Itanim mo sa iyong isipan upang hindi mo makalimutan. ⁴ Ituring mo na parang kapatid na babae ang karunungan at ang pang-unawa na parang isang malapit na kaibigan. ⁵ Sapagkat ilalayo ka nito sa masamang babaeng nakakaakit ang pananalita.

Ang Masamang Babae

⁶ Minsan dumungaw ako sa bintana ng aming bahay. ⁷ Nakakita ako ng mga kabataang lalaki na wala pang muwang sa buhay. Isa sa kanila ay talagang mangmang. ⁸ Lumalakad siya patungo sa kanto kung saan naroroon ang bahay ng isang masamang babae. ⁹ Takip-silim na noon at malapit nang dumilim. ¹⁰ Sinalubong siya ng isang babae na ang suot ay katulad ng suot ng isang babaeng bayaran. Nakapagplano na siya ng gagawin sa lalaking iyon. ¹¹ Maingay siya at hindi mahiyain. Hindi siya nananatili sa bahay. ¹² Madalas siyang makita sa mga lansangan, mga kanto at mga plasa. ¹³ Paglapit ng lalaki ay agad niya itong hinalikan at hindi nahiyang sinabi, ¹⁴ “Tinupad ko na ang pangako kong maghandog, at may mga sobrang karne doon sa bahay na mula sa aking inihandog. ¹⁵ Kaya hinanap kita at mabuti naman nakita kita. ¹⁶ Sinapinan ko na ang aking higaan ng makulay na telang galing pa sa Egipto. ¹⁷ Nilagyan ko iyon ng pabangong mira, aloe, at sinamon. ¹⁸ Kaya halika na, doon tayo magpakaligaya hanggang umaga, ¹⁹ dahil wala rito ang asawa ko. Naglakbay siya sa malayo. ²⁰ Marami siyang dalang pera at dalawang linggo pa bago siya bumalik.”

²¹ Kaya naakit niya ang lalaki sa pamamagitan ng kanyang matatamis at nakakaakit na pananalita. ²² Sumunod agad ang lalaki na parang bakang hinihila papunta sa katayan, o tulad ng isang usa^[a] na patungo sa bitag, ²³ at dooʼy papanain siya na tatagos sa kanyang puso. Para din siyang isang ibon na nagmamadali papunta sa bitag ng kamatayan, ngunit hindi niya ito nalalaman.

²⁴ Kaya mga anak, pakinggan ninyong mabuti ang aking mga sinasabi. ²⁵ Huwag kayong paaakit sa ganyang uri ng babae at huwag ninyong hayaan na kayoʼy kanyang iligaw. ²⁶ Marami na ang mga lalaking napahamak dahil sa kanya. ²⁷ Kapag pumunta kayo sa bahay niya, para na rin kayong pumunta sa daigdig ng mga patay.