Jesustaca Getsemanipimi japishcacuna

18 Jesusca chaicunata nishca q'uipaca, Paipaj yachacujcunandijmi, Cedrón shuti yacu huaicu ch'imbanijman rirca. Chaipica shuj huertami tiyarca. Jesusca paipaj yachacujcunandijmi chaiman yaicurca.

² Tauca cutin Paipaj yachacujcunahuan chaipi tandanacuj cashcamantami, Jesusta japichij Judaspish chai huertataca rijsirca. ³ Judasca achca soldadocunatapish, pushaj curacuna, fariseocuna cachashca chapajcunatapish pushashpami shamurca. Chaicunaca linternacunahuan, nina sindicunahuan, macanacunacunahuanmi shamurcacuna.

⁴ Ashtahuanpish Jesusca, tucui imalla tucuna cashcata ña yachashcamantami, Pairaj c'uchuyamushpaca:

–¿Pitataj mashcacunguichij?– nirca.

⁵ Shina nijpi:

–Nazaretmanta Jesustami mashcacunchij– nijpimi, Jesusca:

–Ñucamari cani– nirca.

Paita japichij Judaspish chaicunahuanmi carca.

⁶ «Ñucami cani» nijpica, paicunaca huashaman tigrashpami, pambaman urmarcacuna. ⁷ Jesús cutinllataj:

–¿Pitataj mashcacunguichij?– nishpa tapujpimi, paicunaca:

–Nazaretmanta Jesustami mashcacunchij– nircacuna.

⁸ Chashna nijpi Jesusca:

–Illu, ‘Ñucamari cani’ ninica. Ñucata mashcacushpaca, Ñucahuan cajcunataca richun saquichijlla– nircami.

⁹ Yaya Diosta: «Can Ñucaman cushcacunataca, shujllatapish mana chingachircanichu» nishca pajtachunmi, chashna tucurca. ¹⁰ Chaipimi Simón Pedroca, pai charicushca espadata surcushcahuan, curacunata mandaj curata servij, Malco shuti runataca, alli lado rinrinta p'itirca.

¹¹ Chashna rurajpimi Jesusca, Pedrotaca:

–Cambaj espadataca, huaquichinallapitaj huaquichilla. Yaya Ñucaman cushca jayaj ubyanataca, ubyanatajmi cani– nircami.

Jesusta japishpaca Anás shuti curapajmanmi pushashcacuna

¹² Chashna nijpica, chai mirga soldadocunapish, paicunata mandajpish, judiocuna cachashca chapajcunapishmi Jesusta japishpa huatarcacuna. ¹³ Chaimantaca, curacunata chai huata mandacuj Anás shuti curapajmanrajmi pusharcacuna. Paica, Caifaspaj suegromi. ¹⁴ Caifasmi judiocunamanca: “Tucui israelcunamantaca, shuj runalla huañunamari ashtahuan alli” nishpa yuyaita cushca carca.

Pedroca Jesustaca ‘Mana rijsinichu’ nishcami

¹⁵ Simón Pedrohuan, shuj yachacujhuanmi Jesustaca catishpa rircacuna. Chai yachacujca, curacunata mandaj curapaj rijsishcami carca. Chaimantami paica, chai curacunata mandaj curapaj huasi canllamanca, Jesusdij yaicurcalla. ¹⁶ Ashtahuanpish Pedroca, canlla pungullapimi saquirirca. Chaimantami curacunata mandaj curapaj rijsishca yachacuj llujshimushpaca, pungupi ricujhuan rimashpa, Pedrotapish yaicuchirca.

¹⁷ Pedro yaicujpica, pungupi ricuj solterami:

–Canpish cai runapaj yachacujllatajmari yuyachingui– nijpi, Pedroca:

–Mana chaichu cani– nircami.

¹⁸ Chiri cajpimi servijcunapish, chapajcunapish ninata japichishpa, cunushpa shayacurcacuna. Pedropish paicunallahuantajmi, cunushpa shayacurca.

Jesustaca Anaspaj huasipimi tapushcacuna

¹⁹ Curacunata mandaj curami Jesustaca, Paipaj yachacujcunamantapish, Pai imallata yachachicushcatapish tapurca. ²⁰ Chaicunata tapujpimi, Jesusca cashna nirca:

–Ñucaca, cai pachapi causajcunamanca, tucuicunamanmi rimarcani. Tandanacuna huasipi, Diospaj huasipi, tucui judiocuna tandanacushcapimi yachachij carcani. Imata mana pacalla rimarcanichu. ²¹ ¿Ima nishpataj Ñucataca tapungui? Ñuca imalla nishcata uyajcunata tapuilla, paicunami Ñuca imallata nishcataca yachancuna– nircami.

²² Jesús chashna nijpica, chapajcunamanta shujmi:

–Curacunata mandaj curataca, ¿chashnachu c'ariyangui, imamí?– nishpa, quijadospi huajtarca.

²³ Chaimantami Jesusca:

–Ima mana allita rimashca cajpica, huillaiari. Allillatataj rimashca cajpica, ¿imamantataj huajtangui?– nishpa tapurca.

²⁴ Chaimantaca, curacunata mandaj Anasca Caifaspajmanmi, Jesustaca huatashcallatataj cacharca.

Pedroca Jesustaca cutinmi ‘Mana rijsinichu’ nishca

²⁵ Chaicamaca Pedroca, cunushpallatajmi shayacurca. Chaipimi:

–Canpish Paipaj yachacujllatajmari yuyachingui– nishpa tapurcacuna.

Shina tapujpi Pedroca:

–¡Mana chaichu cani!– nircami.

²⁶ Curacunata mandaj curapaj servijcunapuramanta shujmi:

–Ñuca quiquinmari cantaca chai runahuan huertapi cajta ricurcani– nirca.

Chashna nij runaca, rinrinta Pedro p'itishca runapaj huasi ucupurami carca.

²⁷ Pedro cutinllataj ‘Mana rijsinichu’ nicujpica, galloca ñapish cantarcallami.

Jesustaca Pilatopajmanmi pushashcacuna

²⁸ Tutamanta utcatami Jesustaca, Caifaspaj huasimantaca Pilato mandashpa tiyana huasiman pushashpa rircacuna. Pascua micuita micungapaj ama jarca tiyachunmi, ama mapayangapaj, chai ucumanca mana yaicurcacuna. ²⁹ Chaimantami Pilatoca, paicunapajman llujshishpa:

–Cai runataca, ¿imata juchachishpataj apamunguichij?– nirca.

³⁰ Chashna nijpi paicunaca:

–Mana jatun millai cashca cajpica, mana cambajman pushamunchijmanchu carca– nircacunami.

³¹ Chashna nijpi, Pilatoca:

–Shinashpaca, cancunallataj Paitaca pushashpa, cancunapaj Mandashcapi nishca shina juchachichijlla– nircami.

Chashna nijpi judiocunaca:

–Ñucanchijca, pita huañuchingapaj mandashcataca mana charinchijchu– nircacunami.

³² Ima shina huañuna cashcata Jesusllataj ña huillashca pajtachunmi, chashnaca tucurca. ³³ Pilatoca, mandashpa tiyana ucuman cutin yaicushpa, Jesusta cayashpaca:

–¿Canchu judiocunapaj Jatun Mandaj cangui?– nircami.

³⁴ Shina nijpi Jesusca:

–¿Cambaj yuyaillamantatajchu chashnaca ningui, mana cashpaca shujtajcunachu Ñucamanta chashna nircacuna?– nircami.

³⁵ Chashna nijpi, Pilatoca:

–¿Ñucaca judiochari caniari? Cambaj llajtapuracunallatajmi, pushaj curacunahuan tucushpa, Cantaca ñuca maquipi churarcacuna. ¿Imatataj rurarcanguiari?– nishpami tapurca.

³⁶ Chashna nijpi Jesusca:

–Ñucaca, mana cai pachapichu mandana cani. Ñuca mandana caillapitaj cajpica, judiocuna Ñucata ama japichun, Ñucata servijcuna Ñucamanta macanacunmanmi. Ashtahuanpish Ñuca mandanaca, manamari cai pachapajchu– nircami.

³⁷ Chaimantami Pilatoca:

–Shinashpaca canca, ¿jatun mandajchu cangui?– nijpi Jesusca:

–Canllatajmi Ñucataca, jatun mandaj ningui. Ñucaca cai pachamanca, chaipajllatajmari shamurcani, chaipajmi huacharircani, cashcatataj huillangapajpishmi shamurcani. Pipish, cashcatataj huillajpaj cashpallami, Ñuca imalla nishcataca uyan– nircami.

³⁸ Shina nijpi, Pilatoca:

–¿Imataj, cashcatataj huillanaca?– nircami.

Chashna nishca q'uipaca, judiocunapajman canllaman cutin llujshishpami, cashna nirca:

–Ñucaca, ima millaita rurashcata mana japinichu. ³⁹ Shina cajpipish cancunaca, Pascuapica shuj preźutamari cacharichun munanguichij. Cunanca ¿maijantataj cacharichun ninguichij? ¿“Judiocunapaj Jatun Mandajtachu” cacharichun ninguichij?– nircami.

⁴⁰ Chashna nijpica:

–¡Chaitaca mana cacharichun ninchijchu! ¡Barrabastami cacharichun ninchij!– nishpami, tucuicuna caparirca. Barrabasca, jatun shuhuami carca.