Job 8-10

Ang Salita ng Dios (Tagalog Contemporary Bible)

Nagsalita si Bildad

8 Sumagot si Bildad na taga-Shua, ² “Hanggang kailan ka magsasalita ng ganyan? Nag-iingay ka lang at walang kabuluhan ang mga sinasabi mo. ³ Hindi maaaring pilipitin ng Makapangyarihang Dios ang katarungan o baluktutin ang katuwiran. ⁴ Nagkasala ang iyong mga anak laban sa Dios kaya nararapat lamang ang natanggap nilang kaparusahan. ⁵ Pero kung lalapit ka sa Makapangyarihang Dios, at magmamakaawa sa kanya, ⁶ at mamumuhay nang malinis at matuwid, kahit ngayon ay agad ka niyang tutulungan at ibabalik sa mabuting kalagayan. ⁷ At ang kayamanang ibibigay sa iyo ay higit pa kaysa sa kayamanan mo noon.

⁸ “Tanungin mo ang mga matatanda. Alamin mo kung ano ang natutunan^[a] ng kanilang mga ninuno. ⁹ Sapagkat parang kailan lang tayo ipinanganak at kaunti lang ang ating nalalaman, at ang mga araw natin dito sa mundo ay tulad ng anino na hindi nagtatagal. ¹⁰ Pakinggan mo sila, at sasabihin nila sa iyo ang kanilang nalalaman.

¹¹ “Hindi mabubuhay ang halamang tubig kung walang tubig. ¹² Mamamatay iyon kahit na pasibol pa lang at hindi pa panahong putulin. ¹³ Ganyan din ang kahihinatnan ng lahat ng taong tumatalikod sa Dios. Ang kanyang pag-asa ay mawawala. ¹⁴ Ang lahat ng inaasahan at pinagtitiwalaan niya ay kasinrupok ng sapot ng gagamba. ¹⁵ Kapag sinandalan ito, agad nalalagot; dumidikit ngunit mahina ang kapit. ¹⁶ Kung titingnan parang mabuti ang kalagayan niya, parang tanim na sagana sa dilig at sikat ng araw. Yumayabong ito sa buong hardin ¹⁷ at kumakapit ang mga ugat nito sa mga bato. ¹⁸ Pero kapag nabunot na ito, hindi na pinapansin. ¹⁹ Ganyan ang wakas ng buhay niya, at may tanim na tutubong muli sa lugar na kanyang tinubuan.

²⁰ “Ang totoo, hindi itinatakwil ng Dios ang taong matuwid at hindi niya tinutulungan ang taong masama. ²¹ Patatawanin ka niyang muli, at pasisigawin sa kagalakan. ²² Ipapahiya niya ang mga napopoot sa iyo at wawasakin ang kanilang sambahayan.”

Sumagot si Job

9 Sumagot si Job,

² “Totoo ang sinabi mo. Pero paano mapapatunayan ng tao na wala siyang kasalanan sa harapan ng Dios? ³ Kahit na makipagtalo pa siya sa Dios sa hukuman, wala siyang magagawa, dahil sa isang libong katanungan ng Dios, hindi niya masasagot isa man sa mga ito. ⁴ Marunong at makapangyarihan ang Dios. Sino ang nakipaglaban sa kanya at nagtagumpay?

⁵ “Walang anu-anoʼy pinauuga niya ang mga bundok at natitibag ito sa tindi ng kanyang galit. ⁶ Niyayanig niya ang lupa at ang mga pundasyon nito ay nauuga. ⁷ Kapag inutusan niya ang araw o ang mga bituin, hindi ito sisikat o magbibigay ng liwanag. ⁸ Tanging siya lang ang nakapaglalatag ng langit at nakapagpapatigil ng alon. ⁹ Siya ang manlilikha ng grupo ng mga bituin na tinatawag na Oso, Orion, Pleyades, at mga bituin sa katimugan. ¹⁰ Gumagawa siya ng mga kahanga-hangang bagay at mga himalang hindi kayang unawain at bilangin. ¹¹ Kapag dumadaan siya sa tabi ko, hindi ko siya nakikita o nararamdaman. ¹² Kung may gusto siyang kunin, walang makakapigil sa kanya. At sino ang makakapagreklamo sa mga ginagawa niya? ¹³ Hindi pinipigil ng Dios ang kanyang galit. Kahit ang mga katulong ng dragon na si Rahab ay yumuyukod sa takot sa kanya. ¹⁴ Kaya papaano ko ipagtatanggol ang sarili ko sa Dios? Ano ang mga salitang maaari kong gamitin para makipagtalo sa kanya? ¹⁵ Kahit na wala akong kasalanan, hindi ko maipagtatanggol ang sarili ko. Ang magagawa ko lamang ay magmakaawa sa Dios na aking Hukom. ¹⁶ Kahit hilingin kong magkausap kami at pumayag siya, hindi pa rin niya ako pakikinggan. ¹⁷ Sapagkat pinapahirapan niya ako na parang sinasalanta ng bagyo, at dinadagdagan pa niya ang paghihirap ko nang walang dahilan. ¹⁸ Halos malagot na ang aking hininga dahil sa paghihirap na idinulot niya sa akin. ¹⁹ Kung lakas ang pag-uusapan walang tatalo sa kanya! At kung sa hukuman idadaan, sinong makapaghahabla sa kanya? ²⁰ Kahit na wala akong kasalanan, paparusahan pa rin ako dahil sa mga sinabi ko. ²¹ Kahit na wala akong kapintasan, wala na itong halaga sa akin ngayon. Kinamumuhian ko na ang aking buhay. ²² Pareho lang naman ang kapalaran ng matuwid at masama. Lahat sila ay mamamatay. ²³ Kapag biglang namatay sa kalamidad ang matuwid, natatawa lang siya. ²⁴ Ipinagkatiwala niya ang mundo sa masasama. Tinatakpan niya ang mata ng mga hukom para hindi sila humatol ng tama. Kung hindi siya ang gumagawa nito, sino pa kaya?

²⁵ “Madaling lumipas ang mga araw sa buhay ko; mas mabilis pa ito kaysa sa mananakbo. Lumilipas ito nang walang nakikitang kabutihan. ²⁶ Dumadaan ito na kasimbilis ng isang matuling sasakyang pandagat o ng agilang dumadagit ng pagkain. ²⁷ Kahit tumigil na ako sa pagdaing at pagdadalamhati at akoʼy ngumiti na, ²⁸ nananaig pa rin sa akin ang takot sa mga paghihirap na maaaring dumating sa akin. Dahil alam kong hindi niya ako ituturing na walang kasalanan. ²⁹ Yaman din lamang na itinuring na niya akong may kasalanan, wala nang halaga na ipagtanggol ko pa ang aking sarili. ³⁰ Kahit sabunan ko pa ang aking buong katawan para luminis, ³¹ ilulubog pa rin niya ako sa maputik na hukay, upang kahit ang sarili kong damit ay ikahiya ako. ³² Hindi tao ang Dios na katulad ko; hindi ko siya kayang sagutin o isakdal man sa hukuman. ³³ Mayroon sanang mamagitan sa amin para pagkasunduin kaming dalawa, ³⁴ at mapatigil sana niya ang pagpalo ng Dios sa akin, para hindi na ako matakot. ³⁵ Kung magkagayoʼy makakausap ko na ang Dios nang walang takot, pero sa ngayon hindi ko pa ito magagawa.”

10 “Kinasusuklaman ko ang buhay ko, kaya dadaing ako hanggaʼt gusto ko. Sasabihin ko ang aking sama ng loob. ² Ito ang sasabihin ko sa Dios: ‘Huwag nʼyo akong hatulan na masama ako. Sabihin nʼyo sa akin kung ano ang kasalanan ko sa inyo. ³ Natutuwa ba kayo na pinahihirapan nʼyo ako? Bakit nʼyo itinatakwil ang inyong nilikha, at sinasang-ayunan naman ang binabalak ng masama? ⁴ Ang paningin nʼyo baʼy tulad ng paningin ng tao? ⁵ Ang buhay nʼyo baʼy kasing-ikli ng buhay ng tao? ⁶ Bakit pilit nʼyo akong hinahanapan ng kasalanan? ⁷ Alam nʼyong wala akong kasalanan, pero sino ang makapagtatanggol sa akin mula sa inyong kamay?

⁸ “ ‘Kayo ang gumawa at humubog sa akin, at ngayon kayo rin ang sisira sa akin. ⁹ Alalahanin ninyong akoʼy hinubog nʼyo mula sa lupa^[b] at ngayon baʼy ibabalik nʼyo na ako sa lupa? ¹⁰ Hindi baʼt kayo ang humubog sa akin mula sa sinapupunan ng aking ina na parang keso na hinubog mula sa gatas? ¹¹ Binuo nʼyo ang aking mga buto at litid, at saka binalutan ng laman at balat. ¹² Pagkatapos, binigyan nʼyo ako ng buhay, pinakitaan ng kabutihan at iningatan. ¹³ Pero nalaman ko na ang tunay ninyong plano sa akin ¹⁴ ay ang bantayan ako kung magkakasala ako at kapag nangyari iyon, hindi nʼyo ako patatawarin. ¹⁵ Nagkasala man ako o hindi, pareho lang naman na nakakaawa ako, dahil sa labis na kahihiyan at paghihirap na dinaranas ko. ¹⁶ Pinagsisikapan kong bumangon, pero para kayong leon na nakaabang sa akin. Ginagamit nʼyo ang inyong kapangyarihan laban sa akin. ¹⁷ Patuloy nʼyo akong isinasakdal at lalo kayong nagagalit sa akin. Walang tigil nʼyo akong nilulusob.

¹⁸ “ ‘Bakit niloob nʼyo pa na isilang ako? Sanaʼy namatay na lang ako at wala nang nakakita sa akin. ¹⁹ Hindi na lang sana ako nilikha. Namatay na lang sana ako bago isinilang at itinuloy sa libingan. ²⁰ Maikling panahon na lang ang natitira sa akin, kaya hayaan nʼyo na lang ako para kahit saglit man lang ay sumaya naman ako, ²¹ bago ako pumunta sa lugar na malungkot at madilim, at hindi na ako makakabalik pa rito. ²² Napakadilim sa lugar na iyon; palaging gabi at walang liwanag, at naghahari doon ang kaguluhan.’ ”