Job 40-42

Ang Pulong Sa Dios

40 Miingon pa gayod ang Ginoo kang Job, ² “Makiglalis ka ba sa Makagagahom nga Dios? Buot mo bang ipasabot nga sayop ako. Karon, tubaga ako.” ³ Busa mitubag si Job sa Ginoo, ⁴ “Dili ako takos nga motubag kanimo. Unsay may akong itubag? Maghilom na lang ako.^{[a] 5} Daghan na akog nasulti. Dili na ako magpadayon pa pagsulti.” ⁶ Unya miingon pag-usab ang Ginoo kang Job gikan sa buhawi, ⁷ “Andama ang imong kaugalingon, ug tubaga ang akong mga pangutana. ⁸ Gusto mo bang pamatud-an nga dili ako matarong aron mogawas nga ikaw ang matarong? ⁹ Gamhanan ka ba sama kanako? Makapadahunog ka ba sa imong tingog sama kanako? ¹⁰ Kon makahimo ka niana, ipakita ang imong pagkagamhanan, pagkahalangdon, ug pagkadungganon. ^11-12 Ipagawas ang imong kapungot sa mga garboso pinaagi sa pagpaubos mo kanila. Ug dugmoka ang mga daotan sa ilang gitindogan. ¹³ Taboni silang tanan ug yuta, sa dapit sa mga patay. ¹⁴ Kon mahimo mo kana, ako mismo ang modayeg kanimo, ug dawaton ko nga may katakos ka sa pagluwas sa imong kaugalingon.

¹⁵ “Tan-awa ang mananap nga Behemot.^[b] Managsama kamo nga akong binuhat. Mokaon ra kini ug sagbot sama sa baka, ¹⁶ apan kusgan kaayo. Ang lawas niini labihan kalig-on. ¹⁷ Ang iyang ikog sama kagahi sa kahoyng sedro, ug dagko kinig mga paa. ¹⁸ Ang iyang mga bukog sama kagahi sa tubo nga bronsi o kabilya. ¹⁹ Kahibulongan siya sa tanan kong binuhat, apan ako nga nagbuhat kaniya makapildi kaniya. ²⁰ Manabsab kini sa mga bukid diin nagadula ang mga ihalas nga mga mananap. ²¹ Maghapa kini ilalom sa tanom nga lutos, nga magpahipi sa mga bugang. ²² Ang mga tanom nga lutos ug uban pang mga tanom sa daplin sa sapa maoy iyang silonganan. ²³ Dili siya mahadlok sa sulog sa suba. Daw wala lang kaniya ang tubig sa Suba sa Jordan nga halos molapaw na kaniya. ²⁴ Kinsay makadakop kaniya pinaagi sa pagbuta kaniya? Kinsay makatuhog sa iyang ilong pinaagi sa lit-ag?

41 “Job, mapingwit mo ba ang Leviatan? Mahiktan mo ba ang iyang baba^[c] ug pisi? ² Matuhog mo ba ug pisi ang iyang ilong? Makaw-itan mo ba ang iyang apapangig? ³ Magsige ba siyag pakilooy kanimo nga imong siyang buhian? Mosulti ba siya ug malumong mga pulong kanimo? ⁴ Makigsabot ba siya kanimo aron mahimo mo na siyang ulipon sa tibuok niyang kinabuhi? ⁵ Mahimo mo ba siyang alimahan sama sa langgam o ihatag sa mga batang babaye aron ilang dulaan? ⁶ Paliton ba siya sa mga negosyante ug tadtaron aron ibaligya? ⁷ Makadulot ba ang bangkaw sa iyang panit o sa iyang ulo? ⁸ Kon imo kining madakop, dili mo na gayod makalimtan ang kalisod sa pagpakigbisog kaniya, ug dili mo na kini usbon pa. ⁹ Walay pulos ang pagtinguha sa pagdakop kaniya. Pagkakita mo pa lang kaniya mawad-an ka na ug kaisog. ¹⁰ Kon walay mangahas sa pagtugaw kaniya, kinsa may makahimo sa pagpakigkontra kanako? ¹¹ Kinsay makaingon nga may utang ako kaniya? Akoy tag-iya sa tanang butang dinhi sa kalibotan.

¹² “Sultihan ko pa gayod ikaw bahin sa lawas sa Leviatan ug kon unsa siya kagamhanan ug kakusgan. ¹³ Kinsay makalaksi sa iyang panit o makadulot niini? ¹⁴ Kinsay makaabli sa iyang baba nga may makalilisang nga mga ngipon? ¹⁵ Ang iyang likod daw may daghan kaayong mga taming nga nagpilit. ^16-17 Nagsikit kini pag-ayo nga bisan ang hangin daw dili makasulod, ug walay makalaksi niini. ¹⁸ Inigpangusmo niya mokilab ang kahayag gikan sa iyang ilong, ug ang iyang mga mata sama kapula sa pagbanagbanag sa adlaw. ¹⁹ Mobuga siya ug kalayo, ²⁰ ug manggawas gikan sa iyang ilong ang aso nga daw gikan sa nagbukal nga kolon sa nagadilaab nga sugnod. ²¹ Ang iyang gininhawa makapasiga sa uling, kay gagawas ang kalayo sa iyang baba. ²² Kusgan ang iyang liog, ug ang makakita kaniya mahadlok gayod. ²³ Bisan ang iyang unod labihan kagahi. ²⁴ Ang iyang kasingkasing sama kagahi sa galingan nga bato. ²⁵ Kon mobangon siya mangataranta sa kahadlok ang gamhanan nga mga tawo.^{[d] 26} Walay espada, bangkaw, o pana nga makadulot kaniya. ²⁷ Alang kaniya ang puthaw daw dagami lang kahumok, ug ang bronsi daw gabok nga kahoy. ²⁸ Ang mga pana dili makaabog kaniya. Ang mga bato gikan sa lambayog daw tahop lang alang kaniya. ²⁹ Ang bunal daw dagami lang alang kaniya, ug kataw-an lang niya ang gahadyong nga bangkaw. ³⁰ Ang iyang tiyan nalukop sa himbis nga daw hait nga mga bildo. Busa kon mokamang siya sa lapok, daw gikarasan ang iyang giagian. ³¹ Makutaw ang tubig kon anaa siya sa dagat. Daw tubig kini nga nagbukal diha sa kolon o nagbukal nga lana diha sa kaldero. ³² Ang tubig nga iyang maagian mobula ug puti, nga abi mo ug mga puting buhok. ³³ Walay sama kaniya dinhi sa kalibotan. Usa siya ka mananap nga walay kahadlok. ³⁴ Ubos ang iyang pagtan-aw sa tanang garboso nga mga mananap. Siya ang hari sa tanang ihalas nga mga mananap.”

42 Unya mitubag si Job sa Ginoo, ² “Nahibalo ako nga mahimo mo ang tanan, ug walay makapugong kanimo. ³ Gipangutana mo ako kon nganong nagduhaduha ako sa imong kaalam nga wala man akoy nahibaloan. Tinuod nga nagsulti ako sa mga butang nga wala ko masabti, mga butang nga dili ko matugkad. ⁴ Nakigsulti ka kanako ug miingon ka nga mamati ako kanimo ug tubagon ko ang imong mga pangutana. ⁵ Kaniadto nadungog ko lang sa uban ang bahin kanimo, apan karon nakita ko na gayod ikaw. ⁶ Busa naulaw ako sa tanan kong gisulti bahin kanimo, ug gihinulsolan ko kini pinaagi sa paglingkod sa yuta ug sa abog.”

Ang Kataposan

⁷ Human kini masulti sa Ginoo kang Job, miingon siya kang Elifaz nga taga-Teman, “Nasuko ako kanimo ug sa imong duha ka higala, kay dili husto ang inyong gisulti bahin kanako; dili sama sa gihimo ni Job nga akong alagad. ⁸ Busa karon pagkuha kamo ug pito ka torong baka ug pito ka laking karnero. Lakaw kamo kang Job, ug ihalad ninyo kini isip halad nga sinunog alang sa inyong kaugalingon. Mag-ampo si Job alang kaninyo ug tubagon ko kini ug dili ko kamo silotan nga angay sa inyong kabuang. Wala kamo mosulti ug husto bahin kanako; dili sama sa gihimo ni Job nga akong alagad.”

⁹ Busa gihimo ni Elifaz nga taga-Teman, ni Bildad nga taga-Shua, ug ni Zofar nga taga-Naama ang gisugo sa Ginoo kanila. Ug gitubag sa Ginoo ang pag-ampo ni Job.

¹⁰ Human makaampo si Job alang sa iyang mga higala, gipauswag siya pag-usab sa Ginoo ug gihatagan ug doble sa naangkon niya kaniadto. ¹¹ Unya ang tanan niyang igsoon ug ang tanan niyang higala kanhi nangadto sa iyang balay ug nangaon uban kaniya. Gipadayag nila kang Job ang ilang pagsubo tungod sa tanang kalisod nga gihatag sa Ginoo kaniya. Ug ang matag usa kanila mihatag ug kuwarta ug singsing nga bulawan.

¹² Busa gipanalanginan sa Ginoo ang misunod nga mga bahin sa kinabuhi ni Job labaw pa kaysa kaniadto. Gihatagan niya si Job ug 14,000 ka karnero, 6,000 ka kamelyo, 1,000 ka parisan nga baka, ug 1,000 ka bayeng asno. ¹³ Gihatagan usab niya kini ug pito ka mga anak nga lalaki ug tulo ka mga anak nga babaye. ¹⁴ Ang kamagulangan niya nga anak nga babaye mao si Jemina, sunod si Kezia ug unya si Keren Hapuc. ¹⁵ Walay babaye nga sama kanila katahom sa tibuok nila nga dapit.^[e] Ug gihatagan sila ni Job ug panulondon sama sa ilang igsoon nga mga lalaki.

¹⁶ Human niadto, nabuhi pa si Job ug 140 ka tuig, ug nakita pa niya ang iyang mga kaliwat hangtod sa ikaupat nga henerasyon. ¹⁷ Tigulang na kaayo siya sa dihang namatay siya.