Si Elihu

32 Miundang na sa pagtubag kang Job ang tulo niya ka higala, tungod kay miinsister gayod si Job nga wala siyay sala.

² Unya may usa ka tawo didto nga ginganlag Elihu. Anak siya ni Barakel nga taga-Buz nga naggikan sa pamilya ni Ram. Nasuko siya pag-ayo kang Job kay ang Dios maoy gibasol ni Job ug dili ang iyang kaugalingon. ³ Nasuko usab siya sa tulo ka higala ni Job kay wala nila mapamatud-i nga nakasala si Job ug migawas nga ang Dios maoy sad-an. ⁴ Gihulat ni Elihu nga makahuman ug sulti ang uban ayha siya mosulti kang Job, tungod kay mas magulang sila kay kaniya. ⁵ Apan sa dihang nakita niya nga wala nay ikasulti ang tulo, nasuko siya pag-ayo. ⁶ Busa miingon siya, “Bata pa ako ug kamo tigulang na, busa nagpanagana ako nga mosulti. Nahadlok ako nga mangahas sa pagpadayag kaninyo sa akong hunahuna. ⁷ Giisip ko nga kamo ang angayng motudlo kay mga tigulang na kamo ug daghan kamog nahibaloan. ⁸ Apan ang tinuod, ang espiritu sa Makagagahom nga Dios nga anaa sa tawo mao ang nagahatag kaniya sa panabot. ⁹ Ang pagkatigulang dili garantiya nga ang usa ka tawo maalamon ug nahibalo kon unsay husto. ¹⁰ Busa pamatia ninyo ako. Mosulti usab ako sa akong nahibaloan. ¹¹ Nagpaabot lang ako samtang naghunahuna pa kamo sa angay ninyong isulti. Namati ako sa inyong mga rason. ¹² Namati gayod ako pag-ayo kaninyo, apan wala gayoy usa kaninyo nga nakapamatuod nga nakasala si Job; wala gayod kaninyoy mitubag sa iyang pagpangatarungan. ¹³ Ayaw kamo pag-ingon, ‘Nahibaloan namo kon unsa ang husto. Pasagdi nga ang Dios ang motubag kaniya ug dili ang tawo.’ ¹⁴ Kon ako ang gilalis ni Job, dili ko siya tubagon ug sama sa inyong panubag. ¹⁵ Karon nakahinuktok kamo ug wala nay ikatubag. ¹⁶ Maghulat lang ba ako samtang nagpakahilom kamo ug wala nay ikatubag? ¹⁷ Aduna usab akoy isulti sumala sa akong nahibaloan. ¹⁸ Kay daghan akog ikasulti, ug dili ko na gayod kini kapugngan. ¹⁹ Kabutohon na ako sama sa bag-ong sudlanan sa bino nga hinimo sa panit. ²⁰ Kinahanglan gayod nga mosulti ako aron mahuwasan ako. ²¹ Wala akoy labanan o pasidunggan. ²² Dili ako kahibalong moulog-ulog. Ug kon buhaton ko kini, silotan ako diha-diha sa Dios nga naghimo kanako.”