Ang Tubag ni Zofar

20 Unya mitubag si Zofar nga taga-Naamat, ² “Kinahanglan nga motubag ako kay dili ako mahimutang. ³ Gibadlong mo ako uban ang pagpanginsulto, ug may nagtukmod kanako sa pagtubag kanimo. ⁴ Sigurado gayod nga nasayod ka nga gikan pa sa karaang panahon, sukad nga gibutang ang tawo dinhi sa kalibotan, ⁵ ang kalipay sa tawong daotan lumalabay lang. Oo, dili molungtad ug dugay ang kalipay sa tawo nga dili diosnon. ⁶ Bisag hilabihan ang iyang pagkamapahitas-on, nga daw sangko na kini sa langit o sa panganod, ⁷ mahanaw siya hangtod sa hangtod sama sa iyang tae. Ang mga nakaila kaniya moingon, ‘Hain na siya?’ ⁸ Mahanaw siya sama sa damgo o sa panan-awon sa kagabhion, ug dili na gayod siya makita. ⁹ Dili na siya makita sa nakaila kaniya, ug mahanaw siya sa dapit nga iya kaniadtong gipuy-an. ¹⁰ Ang iyang mga anak maoy magbayad sa iyang gikawat gikan sa mga kabos. ¹¹ Mamatay siya nga batan-on pa ug baskog.

¹² “Ang paghimo ug daotan nahisama sa pagkaon nga tam-is diha sa iyang baba; ¹³ ugomon niya kini ug dugay aron matagamtaman gayod niya ang kalami niini. ¹⁴ Apan pag-abot niini sa iyang tiyan mopait kini ug mahimong hilo nga sama sa lala sa mga bitin. ¹⁵ Isuka niya sama sa pagkaon ang bahandi nga iyang kinawat. Bisan anaa na kini sa iyang tiyan ipasuka kini sa Dios kaniya. ¹⁶ Suyopon niya ang lala sa mga bitin nga mao ang mopatay kaniya. ¹⁷ Dili na niya matagamtaman ang kaabundansya sa lana, keso, ug dugos, nga daw sapa o suba nga magdagayday. ¹⁸ Dili niya madawat ang balos sa iyang hinagoan o magmaya sa iyang bahandi. ¹⁹ Kay gidaog-daog niya ang mga kabos ug gipasagdan niya sila nga maglisod. Giilog niya ang mga balay nga dili iya. ²⁰ Walay katagbawan ang iyang kahakog. Ang bisan unsay iyang magustohan dili niya palabyon. ²¹ Apan wala na siyay makaon, kay ang iyang bahandi mahanaw. ²² Sa iyang kaabundansya, moabot kaniya ang kalisod. Moabot kaniya ang labihan nga pag-antos. ²³ Samtang gitagbaw niya ang iyang kaugalingon, ipatagamtam sa Dios kaniya ang iyang labihan nga kasuko, ug paulanan siya sa silot. ²⁴ Bisag makaikyas siya sa puthaw nga armas, matuhog gihapon siya sa bronsi nga pana. ²⁵ Maigo ang iyang apdo, ug molapos kini sa iyang lawas. Bation niya ang kalisang. ²⁶ Mahanaw ang iyang bahandi diha sa kangitngitan. Sunogon siya ug ang tanan nga nahibilin sa iyang pinuy-anan^[a] sa kalayo nga dili tawo ang nagpasiga. ²⁷ Ipadayag sa langit ang iyang sala ug mosaksi ang yuta batok kaniya. ²⁸ Anuron sa baha ang iyang balay sa adlaw nga ipatagamtam sa Dios ang iyang kasuko. ²⁹ Mao kanay dangatan sa tawong daotan nga gitakda sa Dios alang kaniya.”