ΙΑΚΩΒΟΥ 4:13-5:6

SBL Greek New Testament

¹³ Ἄγε νῦν οἱ λέγοντες· Σήμερον ^[a]ἢ αὔριον ^[b]πορευσόμεθα εἰς τήνδε τὴν πόλιν καὶ ^[c]ποιήσομεν ἐκεῖ ^[d]ἐνιαυτὸν καὶ ^[e]ἐμπορευσόμεθα καὶ ^[f]κερδήσομεν· ¹⁴ οἵτινες οὐκ ἐπίστασθε ^[g]τὸ τῆς αὔριον ^[h]ποία ἡ ζωὴ ὑμῶν· ἀτμὶς γάρ ^[i]ἐστε ^[j]ἡ πρὸς ὀλίγον φαινομένη, ^[k]ἔπειτα καὶ ἀφανιζομένη· ¹⁵ ἀντὶ τοῦ λέγειν ὑμᾶς· Ἐὰν ὁ κύριος ^[l]θελήσῃ, καὶ ^[m]ζήσομεν καὶ ^[n]ποιήσομεν τοῦτο ἢ ἐκεῖνο. ¹⁶ νῦν δὲ καυχᾶσθε ἐν ταῖς ἀλαζονείαις ὑμῶν· πᾶσα καύχησις τοιαύτη πονηρά ἐστιν. ¹⁷ εἰδότι οὖν καλὸν ποιεῖν καὶ μὴ ποιοῦντι, ἁμαρτία αὐτῷ ἐστιν.

5 Ἄγε νῦν οἱ πλούσιοι, κλαύσατε ὀλολύζοντες ἐπὶ ταῖς ταλαιπωρίαις ὑμῶν ταῖς ἐπερχομέναις. ² ὁ πλοῦτος ὑμῶν σέσηπεν, καὶ τὰ ἱμάτια ὑμῶν σητόβρωτα γέγονεν, ³ ὁ χρυσὸς ὑμῶν καὶ ὁ ἄργυρος κατίωται, καὶ ὁ ἰὸς αὐτῶν εἰς μαρτύριον ὑμῖν ἔσται καὶ φάγεται τὰς σάρκας ὑμῶν· ὡς πῦρ ἐθησαυρίσατε ἐν ἐσχάταις ἡμέραις. ⁴ ἰδοὺ ὁ μισθὸς τῶν ἐργατῶν τῶν ἀμησάντων τὰς χώρας ὑμῶν ὁ ^[o]ἀφυστερημένος ἀφ’ ὑμῶν κράζει, καὶ αἱ βοαὶ τῶν θερισάντων εἰς τὰ ὦτα Κυρίου Σαβαὼθ ^[p]εἰσεληλύθασιν· ⁵ ἐτρυφήσατε ἐπὶ τῆς γῆς καὶ ἐσπαταλήσατε, ἐθρέψατε τὰς καρδίας ^[q]ὑμῶν ἐν ἡμέρᾳ σφαγῆς. ⁶ κατεδικάσατε, ἐφονεύσατε τὸν δίκαιον. οὐκ ἀντιτάσσεται ὑμῖν;