Isaias 48
Magandang Balita Biblia
Si Yahweh ang Diyos ng Panahong Darating
48 Dinggin mo ito, O bayang Israel, kayong nagmula sa lahi ni Juda,
sumumpa kayong maglilingkod kay Yahweh,
at sasambahin ang Diyos ng Israel,
ngunit hindi kayo naging tapat sa kanya.
2 Ipinagmamalaki ninyong kayo'y nakatira sa banal na lunsod;
at kayo'y umaasa sa Diyos ng Israel;
ang pangalan niya ay Yahweh na Makapangyarihan sa lahat.
3 Sinabi ni Yahweh sa Israel,
“Noong una pa'y alam ko na kung ano ang mangyayari. Pagkatapos ay bigla ko itong isinakatuparan.
4 Alam kong matitigas ang inyong ulo,
may leeg na parang bakal at noo na parang tanso.
5 Kaya noon pa,
ipinahayag ko na ang mangyayari sa iyo,
upang kung maganap na'y huwag ninyong isipin
na ang mga diyus-diyosan ang may gawa nito.
6 “Lahat ng pahayag ko ay pawang natupad,
inyo nang kilalanin ang katotohanan nito.
Ngayo'y may ihahayag akong bago,
mga bagay na hindi ko inihayag noon.
7 Ngayon ko pa lamang ito gagawin;
wala pang pangyayaring katulad nito noon
para hindi ninyo masabing ito'y alam na ninyo.
8 Alam kong hindi kayo mapagkakatiwalaan,
sapagkat lagi na lamang kayong naghihimagsik.
Kaya tungkol dito'y wala kayong alam,
kahit kapirasong balita'y walang natatanggap.
9 “Dahil na rin sa karangalan ko,
ako ay nagpigil,
dahil dito'y hindi ko na kayo lilipulin.
10 Sinubok ko kayo sa pamamagitan ng kahirapan,
kung paanong ang pilak ay dinadalisay sa apoy;
ngunit kayo'y napatunayang hindi nararapat.
11 Ang ginawa ko'y para na rin sa sariling kapakanan,
paghamak sa ngalan ko'y hindi ko pahihintulutan.
Ang karangalan ko'y tanging akin lamang,
walang makakahati kahit na sinuman.”
Si Ciro ang Pinunong Pinili ni Yahweh
12 Sinabi(A) ni Yahweh,
“Makinig ka sa akin, O Israel, bayang aking hinirang!
Ako lamang ang Diyos;
ako ang simula at ang wakas.
13 Ako ang lumikha sa pundasyon ng daigdig,
ako rin ang naglatag sa sangkalangitan;
kapag sila'y aking tinawag, agad silang tutugon.
14 “Magsama-sama kayo at makinig!
Walang nakaaalam isa man sa mga diyus-diyosan,
na ang hinirang ko ang lulusob sa Babilonia;
at gagawin niya ang lahat ng ipapagawa ko.
15 Ako ang tumawag sa kanya,
pinatnubayan ko siya at pinagtagumpay.
16 Kayo ay lumapit at pakinggan ang aking sasabihin.
Sa mula't mula pa'y hayagan ako kung magsalita
at ang sabihin ko'y aking ginagawa.”
Sa kapangyarihan ng espiritu ng Panginoong Yahweh, ako'y kanyang sinugo.
Ang Plano ni Yahweh sa Kanyang Bayan
17 Ganito ang sabi ng Banal na Diyos ng Israel,
ni Yahweh na sa iyo'y tumubos:
“Ako ang iyong Diyos na si Yahweh.
Tuturuan kita para sa iyong kabutihan,
papatnubayan kita sa daan na dapat mong lakaran.
18 “Kung sinusunod mo lang ang aking mga utos,
pagpapala sana'y dadaloy sa iyo,
parang ilog na hindi natutuyo ang agos.
Tagumpay mo sana ay sunud-sunod,
parang along gumugulong sa dalampasigan.
19 Ang iyong lahi ay magiging sindami sana ng buhangin sa dagat,
at tinitiyak kong hindi sila mapapahamak.”
20 Lisanin(B) ninyo ang Babilonia, takasan ninyo ang Caldea!
Buong galak na inyong ihayag sa lahat ng lugar
na iniligtas ni Yahweh ang lingkod niyang si Israel.
21 Nang patnubayan ni Yahweh ang bayang Israel, sa pagtawid sa malawak at mainit na disyerto,
hindi ito nauhaw bahagya man
sapagkat binutas niya ang isang malaking bato, at ang tubig ay bumukal.
22 Ang(C) sabi ni Yahweh, “Walang kapayapaan ang mga makasalanan!”
Isaias 48
Ang Biblia (1978)
Pinagsalitaan ang Israel dahil sa di pagtatapat.
48 Iyong dinggin ito, Oh sangbahayan ni Jacob, na tinatawag sa pangalan ng Israel, (A)at nagsilabas sa bukal ng Juda; (B)na nagsisumpa sa pangalan ng Panginoon, at nagsibanggit ng (C)Dios ng Israel, nguni't hindi sa katotohanan, o sa katuwiran man.
2 (Sapagka't sila'y tinatawag ayon sa bayang banal, at nagsitiwala (D)sa Dios ng Israel; ang Panginoon ng mga hukbo ang kaniyang pangalan):
3 (E)Aking ipinahayag ang mga dating bagay mula nang una; oo, yao'y lumabas sa aking bibig, at aking ipinakilala: biglang ginawa ko, at nangyari.
4 Sapagka't nakilala ko, na ikaw ay (F)mapagmatigas, at ang iyong leeg ay parang litid na bakal, at ang iyong noo ay parang tanso:
5 Kaya't aking ipinahayag sa iyo mula nang una; bago nangyari ay ipinakilala ko sa iyo: (G)baka iyong sabihin, Mga ginawa ng aking diosdiosan, at ang aking larawang inanyuan, at ang aking larawang binubo, nagutos sa kanila.
6 Iyong narinig; tingnan mong lahat ito; at kayo, hindi ba ninyo ipahahayag? Ako'y nagpakita sa iyo ng mga bagong bagay mula sa panahong ito, sa makatuwid baga'y mga kubling bagay na hindi mo naalaman.
7 Mga nalikha ngayon, at hindi mula nang una; at bago dumating ang araw na ito ay hindi mo nangarinig; baka iyong sabihin, Narito, aking nangaalaman.
8 Oo, hindi mo narinig; oo, hindi mo naalaman; oo, mula nang una ay hindi nabuksan ang iyong pakinig: sapagka't talastas ko na ikaw ay gumawa na totoong may kataksilan, at tinawag na mananalangsang (H)mula sa bahay-bata.
9 Dahil (I)sa aking pangalan ay (J)aking iuurong ang aking galit, at dahil sa kapurihan ko ay aking ititigil, upang huwag kitang ihiwalay.
10 Narito dinalisay (K)kita, nguni't hindi parang pilak; pinili kita sa (L)hurno ng kadalamhatian.
11 Dahil din sa akin, dahil din sa akin, aking gagawin yaon; (M)sapagka't, bakit lalapastanganin ang aking pangalan? (N)at ang kaluwalhatian ko ay hindi ko ibinigay sa iba.
Ipinangako ang pagkaligtas mula sa Babilonia.
12 Inyong dinggin ako, Oh Jacob, at Israel na tinawag ko: (O)Ako nga; (P)ako ang una, ako rin ang huli.
13 Oo, ang aking kamay ay siyang (Q)naglagay ng patibayan ng lupa, at ang aking kanan ay siyang nagladlad ng langit: pagka ako'y tumatawag sa kanila, sila'y nagsisitayong magkakasama.
14 Kayo'y magpipisan, kayong lahat, at inyong dinggin; (R)sino sa kanila ang nagpahayag ng mga bagay na ito? (S)Siyang iniibig ng Panginoon ay (T)kaniyang tutuparin ang kaniyang kaligayahan sa Babilonia, at bubuhatin niya ang kaniyang kamay sa mga (U)Caldeo.
15 Ako, ako nga'y nagsalita; oo, aking tinawag siya; (V)aking dinala siya; at kaniyang pagiginhawahin ang kaniyang lakad.
16 Kayo'y magsilapit sa akin, inyong dinggin ito; mula sa pasimula ay (W)hindi ako nagsalita ng lihim; mula nang panahon na nangyari ito, nandoon nga ako: at ngayo'y sinugo ako (X)ng Panginoong Dios, at nang kaniyang Espiritu.
17 Ganito ang sabi ng (Y)Panginoon, ng inyong Manunubos, ng Banal ng Israel, Ako ang Panginoon mong Dios, na nagtuturo sa iyo ng mapapakinabangan, na pumapatnubay sa iyo sa daan na iyong marapat na lakaran.
18 Oh kung dininig mo ang aking mga utos! (Z)ang iyo ngang kapayapaan ay naging parang ilog, at ang iyong katuwiran ay parang mga alon sa dagat:
19 Ang (AA)iyo namang lahi ay naging parang buhangin at ang suwi ng iyong tiyan ay parang mga butil niyaon: ang kaniyang pangalan ay hindi mahihiwalay o magigiba man sa harap ko.
20 Kayo'y magsilabas sa Babilonia, (AB)inyong takasan ang mga Caldeo; kayo'y mangagpahayag na may tinig ng awitan, inyong saysayin ito, itanyag ninyo hanggang sa wakas ng lupa: inyong sabihin, (AC)Tinubos ng Panginoon ang Jacob na kaniyang lingkod.
21 (AD)At sila'y hindi nangauhaw nang pinapatnubayan niya sila sa mga ilang; (AE)kaniyang pinaagos ang tubig mula sa bato para sa kanila; kaniyang ginuwangan din naman ang bato, at ang tubig ay bumukal.
22 Walang kapayapaan (AF)sa masama, sabi ng Panginoon.
Magandang Balita Biblia, Copyright © Philippine Bible Society 2012.
Ang Biblia Copyright © Philippine Bible Society 1905, 1915, 1933, 1978