Isaias 26:3-13

Ang Salita ng Dios (Tagalog Contemporary Bible)

³ Panginoon, bigyan nʼyo nang lubos na kapayapaan ang taong kayo lagi ang iniisip dahil nagtitiwala siya sa inyo.
⁴ Magtiwala kayong lagi sa Panginoon,
    dahil siya ang ating Bato na kanlungan magpakailanman.
⁵ Ang totoo, ibinabagsak niya ang mga mapagmataas.
    Winawasak niya ang kanilang lungsod hanggang sa madurog sa lupa.
⁶ At itoʼy tinatapak-tapakan ng mga dukha na kanilang inapi.

⁷ Patag ang daan ng taong matuwid, at kayo, Panginoong matuwid, ang nagpatag nito.
⁸ Panginoon, sinunod namin ang inyong mga utos,
    at nagtiwala kami sa inyo.
    Hangad namin na kayo ay aming maparangalan.
⁹ Buong puso kitang hinahanap-hanap kapag gabi.
    Kung hahatulan nʼyo ang mga tao sa mundo,
    matututo silang mamuhay nang matuwid.
¹⁰ Kahit kinaaawaan nʼyo ang masasama,
    hindi pa rin sila natututong mamuhay nang matuwid.
    Kahit na naninirahan silang kasama ng mga matuwid,
    patuloy pa rin sila sa kanilang gawaing masama,
    at hindi nila kinikilala ang inyong kapangyarihan.
¹¹ Panginoon, nakahanda na po kayong magparusa sa kanila,
    pero hindi nila alam.
    Ipaalam nʼyo sa kanila, Panginoon.
    Ilagay nʼyo po sila sa kahihiyan. Ipakita nʼyo sa kanila kung gaano nʼyo kamahal ang iyong mga mamamayan.
    Lipulin nʼyo po sa pamamagitan ng inyong apoy ang inyong mga kaaway.

¹² Panginoon, ilagay nʼyo po kami sa mabuting kalagayan,
    sapagkat ang lahat ng aming nagagawa ay nagagawa namin sa tulong ninyo.
¹³ Panginoon na aming Dios,
    pinamahalaan kami ng ibang panginoon,
    pero kayo lang ang aming sinasamba.