Tumaghoy kayo, kayong mga sasakyang-dagat ng Tarsis;
    sapagkat sira ang Tiro, walang bahay o kanlungan!
Mula sa lupain ng Cyprus
    ay inihayag ito sa kanila.
² Tumahimik kayo, kayong mga naninirahan sa baybayin;
    O mga mangangalakal ng Sidon,
ang iyong mga sugo ay nagdaraan sa dagat,
³     at nasa baybayin ng malawak na mga tubig,
ang iyong kinita ay ang binhi ng Sihor,
    ang ani ng Nilo,
    ikaw ang mangangalakal ng mga bansa.
⁴ Mahiya ka, O Sidon, sapagkat nagsalita ang dagat,
    ang tanggulan ng dagat, na nagsasabi,
“Hindi ako nagdamdam, o nanganak man,
    o nag-alaga man ako ng mga binata,
    o nagpalaki ng mga dalaga.”
⁵ Kapag ang balita ay dumating sa Ehipto,
    magdadalamhati sila dahil sa balita tungkol sa Tiro.
⁶ Dumaan kayo sa Tarsis,
    umiyak kayo, kayong mga naninirahan sa baybayin!
⁷ Ito ba ang inyong masayang lunsod,
    na mula pa noong unang araw ang pinagmulan,
na dinadala ng kanyang mga paa
    upang sa malayo ay manirahan?
⁸ Sinong nagpanukala nito
    laban sa Tiro na siyang nagkakaloob ng mga korona,
na ang mga negosyante ay mga pinuno,
    na ang mga mangangalakal ay mararangal sa lupa.
⁹ Pinanukala ito ng Panginoon ng mga hukbo,
    upang hamakin ang kapalaluan ng buong kaluwalhatian,
    upang hiyain ang lahat na mararangal sa lupa.
¹⁰ Apawan mo ang iyong lupain na gaya ng Nilo,
    O anak na babae ng Tarsis;
    wala nang pampigil.
¹¹ Kanyang iniunat ang kanyang kamay sa karagatan,
    kanyang niyanig ang mga kaharian.
Ang Panginoon ay nag-utos tungkol sa Canaan,
    upang gibain ang mga tanggulan.
¹² At kanyang sinabi,
“Ikaw ay hindi na magagalak pa,
    O ikaw na aping anak na birhen ng Sidon;
bumangon ka, magdaan ka sa Chittim,
    doon ma'y hindi ka magkakaroon ng kapahingahan.”

¹⁴ Tumangis kayo, kayong mga sasakyang-dagat ng Tarsis,
    sapagkat ang inyong tanggulan ay giba.

¹⁶ “Kumuha ka ng alpa,
    lumibot ka sa lunsod,
    ikaw na masamang babaing nalimutan!
Gumawa ka ng matamis na himig,
    umawit ka ng maraming awit,
    upang ikaw ay maalala.”