Add parallel Print Page Options

अगुवाहरूले इस्राएल अनि यहूदालाई पाप गर्न लगाए

“हे पूजाहारीहरू! हे इस्राएलका कुलहरू! तथा राजाका कुल हो! मेरो कुरा ध्यान दिएर सुन, किनभने न्यायको फैसला तिमीहरूको विरूद्धमा छ।

“किनभने तिमीहरू मिस्पामा पासो र ताबोरका जाल भएकाछौ। शित्तीमका खाल्डाहरू तिनीहरूले खुब गहीरा पारेकाछन्। तर म तिनीहरू सबैलाई दण्ड दिनेछु। म एप्रैमलाई चिन्दछु औ इस्राएल मबाट लुकेको छैन। हे एप्रैम! तैंले व्यभिचार गरिस्। इस्राएल अशुद्ध भएकोछ। तिनीहरूका कामले तिनीहरूलाई आफ्ना परमेश्वर तिर फर्कन दिनेछैन, किनकि व्यभिचारी मन तिनीहरूको बीचमा छ र तिनीहरूले परमप्रभुलाई चिन्दैनन्। इस्राएलको अहंकारले आफ्नै विरूद्धमा सबूत दिन्छ। यसकारण, एप्रैम र यहूदा दुवै आ-आफ्नो दोषसित ठोकिनेछन्।

“तिनीहरू आफ्ना ‘भेंडा़-बाख्रा’ र ‘गाई गोरू’ लिएर परमप्रभुलाई खोज्न आउँछन्, तर तिनीहरूले उहाँलाई पाउनेछैनन्। उहाँ तिनीहरूदेखि हट्नु भएको छ। तिनीहरूले परमप्रभुको विरूद्धमा विश्वासघात गरेकाछन्। किनकि तिनीहरूले बतासे छोरा-छोरीहरू जन्माएका छन्। यसर्थ उसले तिनीहरू र तिनीहरूका जमीनहरू नष्ट पार्नेछ।

इस्राएलीहरूको पतन हुने अगमवाणी

“गिबामा सींङ फुक।
    अनि रामामा तुरही फुक।
बेतावनमा खतराको घन्टी बजाऊ।
    हे बिन्यामीन, थरथर होऊ।
दण्डको दिनमा एप्रैम उजाड हुनेछ।
    जे कुरो निश्चय हुनेवाला छ
त्यो इस्राएलका सारा कुलहरूलाई
    मैले जनाएको छु।
10 यहूदाका शासकहरू ती मानिसहरू जस्तै हुन्,
जो आफ्नो सीमा रेखा बढाउँछन्।
    म मेरो रिस तिनीहरूमाथि पानी झैं खन्याउनेछु।
11 एप्रैम कष्टमा परेको छ,
    मेरो न्यायमा त्यो चूर्ण भएको छ,
    किनभने व्यर्थका कुरा पछि लाग्न त्यसले निश्चय गर्यो।
12 अत म एप्रैमलाई नाश पार्ने एउटा कीरा
    अनि यहूदाको घरको निम्ति क्षय जस्तो हुँ।
13 जब एप्रैमले आफ्नो रोग देख्यो,
र यहूदाले आफ्ना चोट देख्यो तब एप्रैम अश्शूरकहाँ गयो,
    त्यसले ठूलो राजाकहाँ मानिस पठायो।
तर त्यसले तिमीलाई निको पार्न सक्तैनँ।
    न त त्यसले तिम्रो चोटलाई जाती पार्न सक्नेछ।
14 किनभने म एप्रैमका निम्ति एउटा सिंह
    अनि यहूदाको घरको निम्ति एउटा सिंहको बच्चा जस्तो हुनेछु।
म आफैं तिनीहरूलाई टुक्रा-टुक्रा पार्नेछु।
म तिनीहरूलाई उठाएर लानेछु।
    अनि तिनीहरूलाई बचाउँने कोही हुनेछैन।
15 जबसम्म तिनीहरूले आफ्ना अपराध,
    स्वीकार गरेर मेरो उपस्थितिको खोजी गर्दैनन्,
    तब सम्म म फर्केर आफ्नै ठाँउमा जानेछु।
आफ्नो कष्टमा तिनीहरूले मलाई यसो भन्दै खोज्नेछन्।”

परमप्रभु तर्फ फर्कि आउँनेको पुरस्कार

“आऊ, हामी परमप्रभुतिर फर्कौ
    किनभने उहाँले हामीलाई घायल पार्नु भएकोछ,
    र उहाँले नै हामीलाई निको पार्नुहुनेछ।
उहाँले चोट पार्नु भएकोछ,
    र उहाँले नै हामीलाई मलम पट्टी बाँध्नु हुनेछ।
दुइ दिनपछि उहाँले हामीलाई पुनःर्जीवित पार्नु हुनेछ
    अनि तेस्रो दिन उहाँले हामीलाई माथि उठाउँनु हुनेछ।
    हामी उहाँकै अघि जिउँदो हुनेछौं।
आऊ, हामी परमप्रभुलाई चिनौं,
    हामी परमप्रभुलाई चिन्ने प्रयन्त गरिरहौं।
हामीलाई थाह छ उहाँ आउनुहुनेछ।
    उहाँको आगमन प्रभात झैं निश्चय छ।
उहाँ हामीकहाँ जमीनलाई भिजाउने,
    आखिरी बर्षा झैं आउनु हुनेछ।”

मानिसहरू विश्वास योग्य छैनन्

“ए एप्रैम, म तिमीलाई के गरूँ?
    ए यहूदा म तिमीलाई के गरूँ?
किनकि तेरो प्रेम बिहानको कुइरो जस्तै,
    र बिलिने शीत जस्तै छ।
यसैकारण मैले तिनीहरूमाथि
    अगमवक्ताद्वारा बञ्चरो चलाएकोछु।
मैले तिनीहरूलाई मेरो मुखको वचनद्वारा घात गरेकोछु।
    मेरो न्यायहरू ज्योति झैं प्रकट हुनेछन।
किनभने म अमर प्रेम चाहन्छु
    बलिदान होइनँ।
अनि मानिसहरूले बल्दै गरेको बलि ल्याउनु भन्दा,
    परमेश्वरलाई बेशी जानेको म चाहन्छु।
तर तिनीहरूले ता आदमले जस्तै करार भङ्ग गरे।
    त्यसैमा तिनीहरूले मेरो विरूद्धमा विश्वासघात व्यवहार देखाए।
गिलाद अधर्मीहरूको शहर हो।
    त्यो रगतले भरिएको छ।
जसरी डाँकूहरूले मानिसलाई ढुकिबस्छन्,
    त्यसरीनै पूजाहरीहरूले गट्ठा बाँधेका छन्।
तिनीहरूले शकेम जाने बाटोमा हत्या गर्दछन्।
    निश्चय तिनीहरूले महा-अपराध गरेकाछन्।
10 इस्राएलको कुलमा मैले घिनलाग्दो कुरो देखेको छु,
एप्रैमको वेश्यावृत्ति त्यहाँ छ।
    इस्राएल अशुद्ध भएको छ।
11 ए यहूदा तिम्रा निम्ति पनि कटनीको समय तोकिएको छ।
    त्यो हुनेछ जब म मेरो प्रजाको सुदिन फर्काउनेछु।”