Genesis 37:12-17

Biblia Sacra Vulgata

¹² Cumque fratres illius in pascendis gregibus patris morarentur in Sichem,

¹³ dixit ad eum Israel: Fratres tui pascunt oves in Sichimis: veni, mittam te ad eos. Quo respondente,

¹⁴ Praesto sum, ait ei: Vade, et vide si cuncta prospera sint erga fratres tuos, et pecora: et renuntia mihi quid agatur. Missus de valle Hebron, venit in Sichem:

¹⁵ invenitque eum vir errantem in agro, et interrogavit quid quaereret.

¹⁶ At ille respondit: Fratres meos quaero: indica mihi ubi pascant greges.

¹⁷ Dixitque ei vir: Recesserunt de loco isto: audivi autem eos dicentes: Eamus in Dothain. Perrexit ergo Joseph post fratres suos, et invenit eos in Dothain.