24 ^(A)Teweegombanga bakozi ba bibi
    era tobeesemberezanga.
^2 (B)Kubanga emitima gyabwe giteesa kukola bya butemu,
    era akamwa kaabwe koogera ku kukola bya ffujjo.

^3 (C)Amagezi ge gazimba ennyumba,
    n’okutegeera kwe kugiggumiza.
^4 (D)Olw’amagezi ebisenge by’ayo bijjula ebintu ebirungi,
    eby’obugagga ebitalabikalabika eby’omuwendo omungi.

⁵ Omuntu ow’amagezi aba n’obuyinza,
    n’omuntu alina okumanya yeeyongera amaanyi.
^6 (E)Kubanga okulwana olutalo weetaaga okuluŋŋamizibwa,
    n’okuluwangula, weetaaga abawi b’amagezi bangi.

⁷ Amagezi gasukkirira nnyo omusirusiru,
    talina ky’asobola kwogera mu lukuŋŋaana olw’oku wankaaki.

⁸ Oyo asala enkwe ez’okukola ebibi,
    aliyitibwa mukujjukujju.
⁹ Entegeka ez’obusirusiru muvaamu kwonoona,
    abantu beetamwa omukudaazi.

^10 (F)Bw’oyongobera mu kiseera eky’ebizibu,
    olwo ng’olina amaanyi matono!
^11 (G)Odduukiriranga n’owonya abo abatwalibwa okuttibwa,
    n’abo abali ku njegoyego z’okuttibwa, obawonye okuttirwa obwemage.
^12 (H)Bw’ogambanga nti, “Laba kino twali tetukimanyi,”
    oyo akebera emitima aba talaba?
Oyo akuuma obulamu bwo takimanyi?
    Talisasula buli muntu ng’omulimu gwe bwe guli?

¹³ Mwana wange olyanga omubisi gw’enjuki kubanga mulungi,
    omubisi oguva mu bisenge byagwo guwoomerera.
^14 (I)Era manya nti amagezi gawoomera emmeeme yo,
    bw’onoogafuna onoobeera n’essuubi mu bulamu obw’omu maaso,
    n’essuubi lyo teririkoma.

¹⁵ Toteeganga, ng’omunyazi bw’akola ku nnyumba y’omutuukirivu,
    tonyaganga maka ge.
^16 (J)Omuntu omutuukirivu ne bw’agwa emirundi omusanvu, addamu n’ayimuka,
    naye abakozi b’ebibi basuulibwa mu mitawaana.

^17 (K)Tosanyukanga ng’omulabe wo agudde,
    bwe yeesittalanga omutima gwo gulemenga okujaguza.
¹⁸ Si kulwa nga Mukama akiraba ne kitamusanyusa,
    n’amusunguwalira.

^19 (L)Teweeraliikiriranga olw’abo abakola ebibi,
    so abakozi b’ebibi tobakwatirwanga buggya.
^20 (M)Kubanga omuntu omubi talina ssuubi mu maaso,
    ettabaaza y’abakozi b’ebibi erizikizibwa.

^21 (N)Mwana wange otyanga Mukama, ne kabaka,
    era teweetabanga na bajeemu.
²² Kubanga obusungu bwabwe bulibuubuukira ku bajeemu
    era ani amaanyi akabi akalibatuukako?

²⁶ Eky’okuddamu eky’amazima,
    kiri ng’okunywegerwa.

²⁷ Malirizanga omulimu gwo ogw’ebweru,
    oteeketeeke ennimiro zo,
    n’oluvannyuma olyoke weezimbire ennyumba yo.

^28 (Q)Towanga bujulizi bwa bulimba ku muliraanwa wo,
    so akamwa ko tekalimbanga.
^29 (R)Toyogeranga nti, “Omuntu oyo ndimukola nga bw’ankoze,
    era ndimusasuza nga bw’ampisizza.”

^30 (S)Nayita ku nnimiro ey’omugayaavu,
    ne mpita ne ku nnimiro y’emizabbibu ey’oyo atalina kutegeera.
³¹ Kale laba, ng’ennimiro eyo ebunye amaggwa,
    wansi wonna nga wabikkiddwa omuddo,
    n’olukomera lwayo olw’amayinja nga lugudde.
³² Ne neekaliriza ne ntegeera
    ne nfuna ekyokuyiga mu bye nalaba.
^33 (T)Otulo otutonotono, n’okusumagira akatono,
    n’okufunya emikono okuwummulako,
^34 (U)obwavu bulikutuukako ng’omutemu,
    era n’obwetaavu ng’omutemu.