A A A A A
Bible Book List

EFESIOS 6Mam de Todos Santos Chuchumatán (MVJ)

Yaltzen ejeeˈy cwal, cxeˈl cybiˈna cymana, tuˈntzen t‑xiˈ cyyeecˈana cynimbila twitz Kaaw, tuˈntzen cytena tujxix tumel. Jtneel tcawbil Dios tuj Laaj Mandamyent tuya jun cotz tuˈn Dios ka nbint cyuˈn xjal, ja tzunja lu: “Cxeˈl cynimana cymana bix cytxuy. Ka ma bint cyuˈna juˈwa, chi temela tuj ttz̈yal twitz txˈotxˈ, bix nim tken cytyema at,” tz̈i Laaj Mandamyent.

Yaltzen cyey mambaj bix txuybaj, yaaˈn tumel tuˈn cyoc tena cyakwusalte ke cycwala tuya jun cawbil yaaˈn tuj tumel, sino cytz̈ˈis̈ecke tuya jun cawbilcye tujxix tumel, bix chi xeˈl cyxnakˈtzaˈna tuˈn cyxiˈ lpe tiˈ Kaaw.

Yaltzen cyey akˈanal tjakˈ tcawbil jun patrón, cxeˈl cybiˈna cypatróna tiˈ cyaakˈena. Chi nimela twitz cypatróna, bix chi akˈanala tuya cykil cycˈuˈja tisenxsen nchi akˈanana tjakˈ tcawbil Cristo. Chi akˈanala baˈn yaaˈn nuk oˈcx oj at cypatróna te cyeyˈlte cyey, sino seyˈx chi ocaley, tisexsen nchi akˈanana twitz Cristo. Chi akˈanala tuya cykil cycˈuˈja, cuma juˈ taj Dios tuˈn cyakˈanana. Cykˈoˈnc cyipey tiˈj tuˈn cyajbena te cypatróna, tisenxsen nchi akˈanana tuya Kaaw bix yaaˈn nuk jaj nchi akˈanana cyuya xjal. Cytzkiˈntla alcye jun kˈij jaca juun xjal ctcaman jun tcotz tkˈaˈ Kaaw laˈ alcye akˈuntl otk bint tuˈn, atle tpatrón, minlen‑al tpatrón.

Yaltzen ke cyey patrón, jax juˈx baˈnx cyseˈy cynaabla cye cy‑akˈanala. Cykˈoncj cyiw cynaabla cyiˈ ke cy‑akˈanala. Cˈulel tuj cycˈuˈja yaaˈn nuk oˈcxcˈa ke cy‑akˈanala eteˈ tjakˈ tcawbil Kaaw at tuj cyaˈj, sino cyuyaxa eteˈy tjakˈ tcawbilxin. Chi elela junx cyuya cy‑akˈanala twitzxin, cuma tuj twitzxin min‑al jun mas nintzaj twitz juntl.

Juˈtzen tten tuˈn t‑xiˈ cyyeecˈana cynimbila cyxola.

Kej macbil ntzaj tkˈoˈn Dios ke tuˈn kkˈojl cyuya kej biman

10 Tuˈntzen tpon baj twiˈ nyola cyey, key hermano, cxeˈl nkbaˈna cyey ti tten tuˈn cyxcyey tibaj kaˈ. At cymojbabl cyiiba tuya Kaaw. Nimxsen tipemalxin at. Bix cuma at cymojbabl cyiiba tuyaxin, juˈ tzunj at tipemalxin te cyey tuˈn cyxcyey tibaj kaˈ. Tzˈajbentzen tipemalxin cyey. 11 Tisen jun soldado te twitz txˈotxˈ ikenxsen tbanel t‑xbalen bix tmacbil tuj kˈoj, jaxsen juˈx cyey. Jax cyikem cyey jtbanel tipemal Kaaw tuˈn tajben cyey tuˈntzen cyweˈxixa twitz taaw kaˈ oj cyoca tuj niyˈbebl tuˈn, tuˈn tbint kaˈ cyuˈna. 12 Oj kkˈojl, yaaˈn cyuya xjal, sino cyuya kej biman, jawnexsen cyipemal. Min chicˈajke, bix nim cybaj. Ejeeˈtzen bimanja eteˈ twitz cyaˈj tuj klolj. Bix nchi cawen tuˈn tbint kaˈ twitz txˈotxˈ, bix nimxsen pomnina baj cyilbil tiˈj tuˈn cycaman cyibaj xjal twitz txˈotxˈ. 13 Juˈ tzunj il tiˈj binne cytena tuyaj tipemal Kaaw tzin tkˈoˈn Dios cyey. Katzen binne cytena juˈwa, baˈntzen cypantey oj tpon jun kˈij nojne tuya kaˈ cyiˈja. Mintzen otk chi iyˈ tzˈaka oj tbaj twiˈ cykˈoja tuya kaˈ. 14-17 Juˈ tzunj, key hermano, chi ajbenxit jcymacbila tzin tkˈoˈn Dios cyey, tisen nchi ajben cymacbil soldado tuj kˈoj tuˈn cycaman. Jun soldado n‑oc tsinch tcˈuˈj tuˈntzen tbint tkˈojl. N‑oc xcbil ttziiˈ t‑xuucˈ tuˈn miˈn tzˈocx twiˈ espada tuj. Toc t‑xaab tbanel tuˈn miˈn cub tuj kˈoj. Kˈiˈn jun makbil tuˈnxin tuˈn miˈn tzakˈxin cyuˈn tbakˈ scopet oj cyoc xeˈt tiˈ tanemxin. Cjawex tpasbil tisen joˈs̈ tuyax te maksbil twitz te colbil twitz tuˈn miˈn tzakˈ cyuˈn tbakˈ scopet. Bix kˈiˈn tspada tuˈn tuˈntzen t‑xcye tuj kˈoj. Ejeeˈ tzunj lu najben cye soldado tuˈn cykˈojl cyuya enemiwa.

Yaltzen cyey cymacbil oj cykˈojla cyuya biman, ejeeˈ tzunj lu. Jaj nchi yolena jaxxix. Bix jaj kˈiˈn cyuˈna jun cynaabla jiquenxix. Bix jaj n‑el cyniˈya tiˈj tzul Kaaw te cawel twitz txˈotxˈ tuˈn tten twitz txˈotxˈ tuj ttz̈yal. Bix jaj n‑oc ke cycˈuˈja tiˈ Dios, tuˈn tweˈ jcyniyˈbebl biman n‑oc cyxooˈn cyiˈja tisen tbakˈ scopet. Bix jaj cytzkiˈntla o tcol Dios ejeeˈy tuj tkˈab taaw il. Bix jaj tyol Dios najben cyey tuˈn cyxcyey tiˈj niyˈbebl ntzaj cyiˈja tuˈn taaw il. Ejeeˈ tzunj lu te cymacbila tuˈn tajben cyey tuj cykˈoja cyuya ke biman.

18 Tuj cykilca ti nbaj, chi naˈla Dios, bix tuya tonbil Espíritu Santo te cyey. Oj cynaˈna Dios, nchi binchama tisenxsen nchi itzˈleˈna cyiiba, bix cypaˈxixa tuj kˈoj. Bix yaaˈn nuk cyiˈjquey chi naˈla Dios, sino tuyax tiˈ cykilca ocslal.

19 Ojtzen cynaˈna Dios, key hermano, tuyax wiˈja, tuˈntzen at nim tipemal nyola oj t‑xiˈ nkˈumena cye xjal j‑eˈwen nejl pero ya o chicˈajax tuˈn Dios. Bix waja tuˈn cynaˈna Dios wiˈja tuˈntzen mintiiˈ ttz̈i wiˈja oj t‑xiˈ nkˈumena. 20 Bix tuˈnj o txiˈ nkˈumena tiˈj o tyeecˈan Dios weya, juˈ tzunj ntiina tuj tzeeˈ. Juˈ tzunj chi naˈna Dios wiˈja tuˈntzen ttzaj tkˈoˈn Dios t‑xtalbil wibaja, tuˈntzen mintiiˈ ttz̈i wiˈja te kbalte tyol Dios mas.

Jun kˈolbebl tuˈn Pablo te mancˈbil yol

21 Yaltzen weya, miˈn txiˈ nkbaˈna tuj ja wuˈja lu ti nbaj weya, cuma jxin Tíquico cpomel cyxola, bix oj tponxin, ja tzunxin pjel kˈumentexin cyey ti nbaj weya tzalu. Nim n‑oc takˈ Tíquico weya, bix nim najbenxin weya tuj taakˈen Kaaw. 22 Ttzkiˈnxin cykilca ti nbaj wiˈja, bix juˈ tzunj cxeˈl nsmaˈna xina cyuyey, tuˈntzen t‑xiˈ tkˈumenxin cyey tiiˈn ntena bix tiiˈn cyten wuyena. Oj cybintey tiiˈn etoˈya tzalu, bixsen chi jaw tzalaja.

23 Key hermano, chi tenxita tuj ttz̈yal tzin tkˈoˈn Kman Dios tuya Kaaw Jesucristo cyey, bix cyuˈnxit‑xin at tkˈakˈbil cycˈuˈja tiˈ niyˈtl ke hermano tuˈnj cyocslabla tiˈ Dios bix tiˈ Kaaw. 24 Tenxit t‑xtalbil Dios cyibaj cykilcakey jn‑oc takˈ Kaaw Jesucristo cyey tuya jun tkˈakˈbil cycˈuˈja jax.

Oˈcx nyolja.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes