A A A A A
Bible Book List

EFESIOS 3Kekchi (KEK)

Laj Pablo bokbil xban li Dios chi cˈanjelac saˈ xya̱nkeb li ma̱cuaˈeb aj judío

La̱in laj Pablo. Cuanquin chi pre̱xil xban nak nincˈanjelac chiru li Cristo, ut xban nak ninye resil li colba‑ib e̱re la̱ex li ma̱cuaˈex aj judío. Ac xerabi ta na resil nak tenebanbil saˈ inbe̱n xban li Dios xyebal e̱re nak li ruxta̱n li Dios e̱re ajcuiˈ la̱ex li ma̱cuaˈex aj judío. Li Dios, aˈan quicˈutuc re chicuu li naˈleb aˈan, li mukmu nak quicuan chak junxil. Ac xintzˈi̱ba caˈchˈin resil e̱re chirix li naˈleb aˈin. Nak te̱ril xsaˈ li hu li xintzˈi̱ba e̱riqˈuin, te̱nau nak ninnau chi tzˈakal li xya̱lal chirix li Cristo, li mukmu nak quicuan. Junxil ma̱ ani nataˈoc ru lix ya̱lal li mukmu nak quicuan chak. Abanan anakcuan li Santil Musikˈej quixcˈut li xya̱lal chiruheb li profeta ut chiku ajcuiˈ la̱o lix apóstol. Li xya̱lal li naˈleb li mukmu nak quicuan chak junxil, aˈan aˈin: nak la̱ex li ma̱cuaˈex aj judío, textzˈako̱nk li colba‑ib li naxqˈue li Dios kochben la̱o aj judío. La̱ex ralal xcˈajolex ajcuiˈ li Dios ut textzˈako̱nk ajcuiˈ riqˈuin li yechiˈinbil ke xban li Dios xban nak colbilex chic saˈ xcˈabaˈ li Cristo. Yal rusilal li Dios nak quixqˈue saˈ inbe̱n xyebal resil li colba‑ib ut quixqˈue incuanquil re tinba̱nu lix cˈanjel. La̱in li kˈaxal cubenak incuanquil saˈ xya̱nkeb chixjunileb li ralal xcˈajol li Dios. Abanan yal xban lix nimal ruxta̱n li Dios quixqˈue cue li cˈanjel aˈin re xchˈolobanquil che̱ru lix ya̱lal chirix lix nimal ruxta̱n li Cristo ut li lokˈlaj colba‑ib saˈ xcˈabaˈ aˈan. Joˈcan nak tento tinchˈolob yalak bar li xya̱lal li naˈleb li mukmu nak quicuan chak junxil. Chalen chak saˈ xticlajic chixjunil li naˈleb aˈin mukmu chak xban li Dios li quiyi̱ban re chixjunil. 10 Li Dios quixba̱nu chi joˈcaˈin re xcˈutbal chiruheb li cuanqueb xcuanquil saˈ choxa nak numtajenak xnaˈleb li Dios. Teˈxnau nak numtajenak xnaˈleb nak teˈxqˈue retal nak quixjunaji ruheb laj judío riqˈuineb li ma̱cuaˈeb aj judío chokˈ ralal xcˈajol. 11 Ac cˈu̱banbil chak junxil chi joˈcaˈin xban li Dios nak li Ka̱cuaˈ Jesucristo tixjunajiheb ru li ralal xcˈajol. 12 Xban nak ac xkapa̱b li Cristo, junajo chic riqˈuin. Joˈcan nak nakanau chi tzˈakal nak naru chic tocua̱nk chi sum a̱tin riqˈuin li Dios. 13 Joˈcan nak nintzˈa̱ma che̱ru nak incˈaˈ ta̱chˈina̱nk e̱chˈo̱l xban nak yo̱quin chixcˈulbal li raylal xban xyebal e̱re xya̱lal li colba‑ib. Chisahokˈ ban e̱chˈo̱l xban nak re e̱tenkˈanquil xincˈul li raylal.

Cˈajoˈ nocoxra li Cristo

14 Nak nincˈoxlac chirix lix naˈleb li Dios riqˈuin chixjunil li quixba̱nu, nincuikˈib cuib ut ninbantioxin chiru li Acuabej Dios. 15 Li Acuabej Dios aˈan xyucuaˈeb chixjunil li cuanqueb saˈ choxa, joˈ ajcuiˈ saˈ ruchichˈochˈ. 16 Kˈaxal nim li rusilal li Dios. Joˈcan nak nintzˈa̱ma chiru nak li Santil Musikˈej chiqˈuehok e̱cuanquilal ut xcacuilal e̱chˈo̱l saˈ le̱ pa̱ba̱l. 17 Ut nintzˈa̱ma ajcuiˈ chiru nak chicua̱nk le̱ pa̱ba̱l re nak cua̱nk li Cristo e̱riqˈuin chi tzˈakal. Te̱tau taxak xcacuil le̱ chˈo̱l riqˈuin xra̱bal li Dios joˈ eb ajcuiˈ le̱ ras e̱ri̱tzˈin. 18 Nintzˈa̱ma chiru li Dios nak chetauhak taxak ru, joˈ ajcuiˈ chixjunileb laj pa̱banel, nak kˈaxal nim li kara̱bal xban li Cristo. Numtajenak lix rahom li Cristo. Ma̱cˈaˈ xbisbal ut ma̱ ani ta̱taˈok ru lix lokˈal lix rahom li Cristo. 19 Ma̱ jokˈe ta̱ru̱k takatau ru chi tzˈakal lix rahom xban nak ma̱cˈaˈ rosoˈjic ut kˈaxal lokˈ. Nintzˈa̱ma chiru li Dios nak tixcˈut che̱ru nak cˈajoˈ nequexra li Cristo, ut chinujak taxak le̱ chˈo̱l riqˈuin xnimajcual xcuanquil. 20 Lokˈoninbil taxak li Dios li kˈaxal nim xcuanquil chixba̱nunquil nabal chiru li nakatzˈa̱ma. Riqˈuin xnimal xcuanquil nacˈanjelac saˈ li ka̱m ut kˈaxal nim xcuanquil chixba̱nunquil nabal chiru li nakoybeni. 21 Lokˈoninbil taxak li Dios anakcuan ut chi junelic kˈe cutan kaban la̱o aj pa̱banel xban nak junajo chic riqˈuin li Cristo. Joˈcan taxak.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes